UNSC-i Osama bin Laden’er jabaso Hamza noktanger

United Nations, March 2 (Agencies): UN Security Council-i Al Qaida tekolak Osama bin Laden’er jabaso Hamza bin Laden anema tenokdangba agütsüogo.
Hamza bin Laden-i tang teinyakdak Al Qaida lennir Aiman al-Zawahiri melenzüktsü akok ta bilemba agi UNSC-i travel ban, assets freeze aser arms embargo tenokdangbatem agütsü.
UN Security Council indang 1267 ISIS and Al Qaida Sanctions Committee-i taoba Brihostibarnü arishi küm 29 tain Hamza bin Laden anema tenokdangbatem agütsü. Iba anogo United States-i Hamza dak sendakba osang agütsür nem sen 1 million dollars senpet agütsütsü ta sangdong,
Saudi Arabia-ia Hamza bin Laden nem yaküm November ita senso agüja liasü saka yashi (Hokolbar) pa nem senso agütsüba meyipa agir ta osang metetdaktsü.
Saudi Arabia nung asoba Hamza ya Al Qaida nung official züngsem ka lir ta al-Zawahiri-i metetdaktsü. Al-Qaida nung pa sülen anidakertemi Hamza dang kiralongra mapa inyaktsü atema ayongzüker. Pai al-Zawahiri melenzüktü ama repranger, ta Security Council-i agütsüba sangdong nung shia lir.
UNSC Sanctions Committee-i Hamza anema tenokdangba magütsüdang, US State Department indang Rewards for Justice Program ajanga Hamza indang osang sangoktsür nem USD 1 million tashi senpet agütsütsü ta metetdaktsü.
“August 2015 nungi pai pa sülen anidakertem dang United States aser Western linüktem amaktsü atema Internet nung audio aser video osangtem prokshir. May 2011 nung U.S. service züngsemtem tebu khasetba mangyanga United States amaktsü ta pai amokmerener” ta US State Department-isa metetdaktsü.
January 2017 nung State Department-i Hamza ya Specially Designated Global Terrorist ka züngok aser idangji parnoki United States nung mesüra US nunger ket nung Hamza indang rongsen ajak sota ayu.