Kyrgios aser Zverev final asayatsü

Acapulco International tennis

Acapulco, Metsüremi/March 02 (Agencies): Mexico nung tang tesaidak Acapulco International tennis asayamung Hokulbarnü tebur kija asaya ka nung Nick Kyrgios-i 7-5, 5-7 aser 7-6(7) agi John Isner madak takok ngua final nung Alexander Zverev den asayatsü jangjaogo.
Arishi küm 23 tain Australia nunger Kyrgios yagi taküm iba amayamung nung grand slam anaben koka alisang Stan Wawrinka aser Rafa Madal madak takok ngur America nunger Isner madak kanga saka takok nguteta liasü, shiba world ranking nung pa dang jenjang 63 agi temaba nung lir.
Asaya tepiyong nung Isner-i serve aser return nung points timba ngutet saka Australia nungbai tetemjen mapang nung kanga junga asayatet, talisa set tasembuba tiebreak nung kanga junga asaya.
Pai final nung world number 3, Zverev den asayatsü, shibai tanga semi-final ka nung Briton nungi Cameron Norrie madak 7-6(0), 6-3 agi koka liasü.
Zverev shibai taoba küm ana tsüngta ATP title 9 koka lir, pa ya arishi küm 23 tain Norrie asoshi onsara tajung liasü aser mapang kabo pai points 30 nungi 24 ngutet.
German nunger arishi küm 21 tain Zverev ya iba asayamung nung set ajunga takok ngua arua lir aser 2019 küm tang mezüng asayamung nung shilem agir.
“Iba asaya kanga tasak liasü. Mopung kanga aoner, asayatsü temela masü, aser mopung nung pai asayaba kanga tapet amai ni bilemer. Anungji temela masü liasü,” ta Zverev-i asaya temer ashi.
“Semi-final ajangtetba atema ni kanga pelar. Tang tensa nung kechi südir süaka nai asaya akoktsüla. Final tongtetba asoshi ni pelar,” ta paisa ashi.
Kyrgios aser Zverev na taoba mapang trokben asayaba nung tenaprongi asemben-ben koka lir, aser tesüsa taoba küm anaben asayaba nung Zverev-i koka lir.