Naga nunger lanurtem-ia saisapong nung tangar ama asayatsü koka lir

~ L. Kika Pongener.

Tanü putu nung sai-sapong (Games & Sports) ya kanga tongtipang mapa ka kümadokogo. Mapang ka nungbo India lima ajunga nungi Olympic Games nung Football team asen Naga nunger rongnungi Dr.T. Ao captain ser London nung oa asayaba tanü tashi otsü-sutsüsa jembir. Anungji par  semchir-ji tanübo State level, National level aser International level nung nungtuko-sa asayar aika adoker alitsüla. Saka National level tashi nung nungtukosa asayar-a kata malitsüsa.Ya sokar tai asü ?  Mesura lanurtemi temulung magutsür ? Hau, sorkari asayar tajung adoktsüsa asayadak moapu (Stadium) tajung peria meyanglutsütetba agi asayar tajung madoker ta ashitsü akok, ajia nunga ta meshitettsü. Kechiyong asayar tajung adoktsü atema Training ground, Facilities aser Infrastructures peria alitsü nungdaker. Tawa Kohima jila nung Indira Gandhi Stadium nung ‘Artificial Turf ‘ lemer asayatsüsa yanglutetba osang nguogo, ibaji asen Naga nunger sai-sapong nung ‘Otsü-sutsü’ mapa ka asütsü. Anungji iba mapa tajung inyakba atema asenoki Chief Minister-i anir yimsusur aser Department nung tenzüker ajak nem tenungsang agutsüdi. Ano Chief Minister-isa Naga lima District HQ shia Stadium ka-kabo yanglutsü ta ashiba angazüka, ajia nükjidong tajunga ta bilemer. Anungji o agi jembiba dang masü, saka mapa küma inyaktsüla. Tesuiba küm ana-asem ka nungi ‘Hero India Super League’ tenzüker India nunger Foot ball asaya nung asentenshi tuluka adoka, küm ana-asem tsüngda nung terenlok terakabo lia asayaba ngua arudagi. India nungeri Crikete aser Hockey asayaba jangra-pangra reprangba dak alaka Football asaya yabo kanga-bo sapua mereprangi aliba, iba ‘Hero India Super Leaque’ tenzüker kulen nungi Foot ball asaya sapua repranger aika renlokogo. Iba ‘HISL’ asayaba nung North East state-tem Assam, Manipur, Mizoram, Meghalaya nungi lanur asayar tajung Club aika nung dener asayadagi, aser talisa ‘North East United Club’ nung North East state nungi asayar tajung dena lir. Ano Shillong Lajong Club aser Mizoram nungi Club ka, iba Club ana yabo India nung nungtuko Club-tem Mohan Bagan, East Bengal, Mohammaden etc. item Club dena toktepa asayatettsüsa tongtetba ya asen Naga nunger asoshi-a tangazüktsü lesson lir. Naga nunger-bo tanü tashi nung yamala nungtuko asayar madoktsüsa ya koda asü ? ta aiben shisadanger ! Asen Aor lanur rongnungi Jonathan Rongsen Crikete asaya nung Senior level tashi asayatettsüsa tongtetba aser ano Angami nunger asangur ka India nung Football asaya nung Senior level tashi nung asayatettsüsa tongtetba angudang kanga dang numadanga bilemer. Tena amaji ano asen Naga nunger lanur karbo adoktsü merangtsüla. Ano aji tang masü, asen Naga lima nung-ia Football Club ka National level tashi nung asayatsüsa tenzüktsü tang nungi mangdang yur inyaktsüla, aser state sorkar-ia nungdakba lenmang ajak nung yaritsüla. Tanübo Naga nunger lanurtem-ia Crikete, Taekondo, Sepawktakro, Boxing, Karate yamala asaya nung India nung oa ‘Senior Level’ tashi nung asaya-a kar nungbo takok ngua aoba angudang kanga pelar aser maneni meranga asayatsü ajungshir. Tangarbo Games & Sports aser Atteletic nung mongin sua asayatetba ajanga sorkar mapa meinyakyonga kibong taküm mesua alir. Tanü tashi Naga lima nung Kohima jila nung Indira Gandhi Stadium ka aser Sovima nung Crikete Stadium ka akaba dak alaka Stadium tajung ka danga mali. Asen kidanger asen tang nungi tesu state anguba Manipur nungbo küm ishika tejakdang National Games dena host sua asayaogo. Ano Meghalaya nung memenui National Games Host sutettsüsa Stadium peria yangludagi ta angazüker. Atangji asayar tajung adoktsüsa lanur tejangrar liaka Stadium tajung makara kong training agia asayar tajung adoktsü ? Anungji sorkar-i sentong balala yanglua saisapong atema küm shia budget nung inoktsüla aser asaya nung takok ‘Medal’ angurtem nem tangar state-i agutsüba amai ‘Reward’ dalang agutsütsüla. Atangji sorkari temulung aguja sai-sapong nung ‘Medal’ angurtem tushia amshia mapa tajung inyakra lanurtem toktepa asayar tajung aika adoktsü.  Anungji lanur zünger mapa mangurtem sorkar dak dang memetaloki, sai-sapong nung mongin sua asayatetba ajanga pei kibong aser taküm mesua litettsüsa sorkar-i nungdakba lenmang ajak nung yaritsüla. Aji oda, lanurtemi-a saisapong nung temulong aguja nentaka asayatsü jangratsüla. Ano lanur asayar kati metettsüba tongtipang kaji, asayar kati asaya tapu ajak nung ayimdaker masayatsüla, saka asaya tapu ka nung mongin sua asayatsü merangtsüla. Asayar kati moko-sali machitsüla aser yi majemtsüla, moko-sali chia, yi ajemer kati kodanga tangar menepa masayatettsü. Asayar kati kanga junga asaya-a State level, National level aser International level tashi nung asayateta kümra pa/laji sorkar dak memetaloki tepok sünga chiyunga jema takar küma alitsü aser alimai metetba nungtuko nisüng akümtsü. Tanü putu nung joko saisapong (Games & Sports) ya kanga dang tongtipang Industry ka kümadokogo. Akhidang mapangbo iba saisapong ya Physical Exercise aser Entertainment ka atema dang ta züngshia aliba, joko tanü putu nungbo kibong taküm mesua litetba aser mapa agutsütetba Industry ka kümadokogo. Lanur ka tazüngba degree tuluka meliaka asaya nung mongin sua asayatetra, sorkar mapa-sa meinyak-aka, ayong-ayonga kibong taküm mesua litettsü. Anungji zünger sorkar mapai aitsü tang mepushi-i asaya nung temulong agutsür, asayar mongin ka kümer, iba jagi pei taküm aser kibong mesua alitsü merangtsüla-a ta  Naga nunger lanurtem ajak  dang ajungshir.