Putu yimsüsüba menden

Naga nungertem rongnung Ao kin dak aketba yimsü tajung kaji putu yimsüsüba menden alangateta kin kidong shia nungi tatar shimer yimsü asüba ya ka asütsü. Atangji, tanü asüng asenok yimsüsürtem shimtsü atema election agiba ama election agia tatar yimsüsürtemji meshim saka kin kidong shia nungi tangatettep nung ajaki mulunga tatar yimsüsürtemji shimer yok aser pei yari yimsüsüba menden tazüng nungi talak tashi alangateta pei pei putu nung yimsüsüa aru. Iba ama yimsüsübaren tajung ngua Nagaland state kümer külen yimtsüng shia nung Ao kin putu yimsüsüba menden inyakyim reprangzüka Village Council tentet. Ibayongji tangbo Naga nunger yimtsüng shia nung Village Council lir. Itemji state government-i yangluba Village council temzüng ozüngtem kübok yimsü asür. Ajisüaka, Aor yimtsüngtem aika nung putu menden o village council na inyakyim balala nung aoba angur, kechiyong putu mendenjibo küm semer asoshi alangba asütsüa akok saka government-i shimba village council-jibo küm ponga atema dang asütsüa akok. Aji oda, putu mendeni akhi Chungliyimti nungi putu menden alangteta yimsüsüa aruba amato yimsü asür aser Village council-i state government dak sendakba mapatem repranger. Atangji, putu menden aser Village council nung aliba tatar yimsüsürji nisungbo kasa dang asütsüa akok saka inyakyim kenyongi balala lir. Ano, tanübo Mokokchung district ajanger külena Ao lima aika lir. Idakji Aor yimtsüng aika kümteta lir. Item Aor yimtsüngtem rongnung Dimapur district kübok Aoyimti, Aoyimküm, Indisen, Tiryim aser Aoküm yimtem lir. Itemjia Aor yimtemsa asünung putu menden lir aser alitsü tim. Ajisüaka, tanü asüng Mokokchung district adena orr akümer Aor yimtsüngtem nung kümteta aliba putu mendenjibo Chungliyimti nungi aruba putu yimsüsüba mendenji masü saka tanü asüng government-i kümtsüba Village council asütsüla. Iba jagi yimtak yimsüsübaren nung mebentetteti alibatem bentettettsü. Atangji, putu mendensa süaka Dimapur len aliba Aor yimtsüngtem nungbo putu aiti aittsüsa kin kidong tabensa nungi malitsüa akok, ajisüaka village council nungbo melira kin kidong kecha mashishitepi ashiba aser metetba apia shimtsüa akoktsü. Ano, Aor yimsüsübaren amato masü saka village council nung shimba yimsüsürtemjibo küm pongo atema dang shimtsü aser jungra ano khenbo shimshitsüa akok ta bentetbenteta yimsü süa otettsü. Aji oda, tanübo state nung terenlok mapatem inyakba yaa Kohima nungi masü saka yimtak putu menden yimsüsürtemi dang sentong yanglua inyaktsüla teimba kümdagi. Iba ama asenoki repranga lia alima melenshidang, asenok putu yimsüsübaren nunga tanü putu dak apet temelenshitsü aika adoker. Item temelenshitsü nüngdakba mapa kaji aibelener dang nashi ak achiba yimsü ya asütsü. Atangji, akhi putu yimsüsüba ren agi nashi ak agi merenshibaji tim dang liasü, kechiyong iba mapangbo tanü amai sen menünga mamshi. Ajisüaka, tanübo sen amshiba putu asünungji, aibelenertem dang nashi ak masü saka senchi sen dang agi nunga tajungba aser tapetba süla ta bilemer. Ano, yimtak yimtsüng nung yimsüsübaren nung temelenshi ka nüngdakbaji joko village council nung mendenbuba aser Village Development Board nung secretary asütsübo graduate-bo asüba nisung aser pei sen agi yimten mapa inyaka jajatettsüba nisung asütsü nüngdaker. Ano, akok nungbo yimtsüng shia nung village council chairman aser VDB secretary-tem nembo ita sena agütsü nungang shitak asütsü. Tanü asüng Delhi nungi ministry balala nungi sentong tapu balala latetba copy-tem village council dangi yoker, anungji itemji angateta züngtetba aser zülutetba nisung nüngdaker. Joko, village council aser VDB ya pei pei yimtsüng telongzük nung terenlok mapa inyakba department aser agency amato kümogo. Iba tashiji amshia government ajanga yoktsü aliba sentongtem tapu balala peisasa bushia oagi bener aruagi inyaktsüla. Iba jagi dang, yimtsüngtema town-tem dang nungibo tajungba küma renlokyonga aotsü.