Myanmar-i NSCN-K headquarter bendanga agi

Guwahati, March 3 (Agencies): Myanmar army-i Taga tesem nung NSCN-K headquarters atsünga agiogo aser India telungpurtem meindoker ta osang angazüker.
Myanmar army 500 dak temai taoba hopta India telungpur teloktem indang teseptep raksatsü aser NSCN-K headquarters atsünga agi.
Myanmar army-i NSCN-K dang parnok teseptem nungi non-citizen telungpurtem aser prangpong-injang abenba telungpurtem ajak meindoktsü atema tetuyuba agütsü saka NSCN-K-i tashi mangaba sülen iba mapa inyak ta osang angazüker.
Taga nung jenoka aliba India telungpurtem anema Myanmar army-i mapa inyakba ajanga parnok ajak prokshiogo aser Army-i telungpurtem ket nung prangpong aser injang aika ngutetogo ta osang ajangasa shisem.
Myanmar army-i telungpurtem dak tashi amshia meinyaker saka parnok dang Myanmar nung jenoktsü melena India-i meyipa aotsü atema tetuyuba agütsür.
Northeast nungi telungpur telok teimba ka Myanmar nung jenoka lir aser parnoki NSCN (K) teseptem nung alir. Myanmar nung telungpur kwi jenoka lir’ar osang mejangja saka security agency balalai telungpur 2,000 shi ka jenoka alitsü ama ashir.
Myanmar army-i tawa mapa inyakba nung Ulfa-I tanishir kar süogo ta osang jembir saka security osang ajanga item kuli mengutet lir ta ashir.
Myanmar Army-i telungpurtem anema mapa inyaka arudang Ulfa-I tanishir Paresh Baruah aser commander Jytirmoy Asom na khaset ta osang jembir.
February ita tetenzüklen nungi Myanmar army-i Northeast telungpur teloktem- ULFA-I, NSCN-K, NDFB-S aser KLO anema mapa inyaktsü tenzük.
Army osang ajanga ashiba agi, February 2 nü ULFA (I) aser Myanmar Army tsüngda khatepdang ULFA (I) züngsem ka khaset aser ka apu.
Iba mapang Myanmar Army-isa NSCN-K züngsem 6 apu ta osang ajanga ashi.