Longleng nung nakmati atur 4 asü

Guwahati, March 3 (Agencies): Nagaland kübok Longleng district nung ozüngi memelaba nakmati atudak nisung pezü asü. Osang ajanga ashiba agi nakmati aturtem anentsüh agi anenbang. Ajisüaka nisung karibo toxic gas ajanga asü ta ashir.
Assam-Nagaland arrtsü anasa aliba Yonglok yimtsüng nung Honibarnü iba lendong atalok. Tasürtemji Assam nungi liasü aser par asembo (Krishna Gogoi, Tutu Neog aser Dhaneswar) jangjaogo.
“Kü keti aruba report nung parnok mim aketba mopung ajanga asüba masü ta shia lir. Nakmati atuba anena lir aser iba jagi parnok nakmati atudak parnok meyong osettem tabeni aidang lendongji atalok. Parnok telung nung lia anentsüh agi anenbang. Ajisüaka, iba dak sendakba osang tejangja ano mangashi” ta Longleng Deputy Commissioner-i osangbener dang ashi.
State sorkari taoba ita nakmati atuba noktangba sülen Nagaland ajungalen ozüng alema nakmati atuba mapa anena lir. Par pezü kidangi ao aser parnok meyong osettem bener aotsü atema meyipa aru, ta Deputy Commissioner-isa ashi.
Longleng district nung Honibar tashi hopta ka shi tzünglu kanga aru aser iba jagi ali anenoka ai asütsü akok, ta paisa shisem.
Lendong atalokba sülen tasür kinungertem parnok mang Assam-i bener ao. Parnoki post-mortem asütsü memulung. Tasür kibongtem nugi kulikakettem meshiba sülen mang agütsü” ta DC-isa metetdaktsü.
Iba tatalokba ajanga December 13, 2018 nü Meghalaya kübok East Jaintia Hills nung atalokba lendong bilemtetdaktsür.
Meghalaya lendong nung nakmati atur nisung 15 tashi asü. Tang tashi nung mang 2 dang nguteta agitetogo.