Balakot nungi Pakistan sepaitemi tasümang 35 bener ao: Marino

New Delhi, March 04 (Agencies): Interview ka nung jembidang Italy nunger journalist kati, Indian Air Force fighter jets-i Pakistan litsü nung Jaish-e-Mohammad training camp nung bomb pokloktsüba sülen Pakistani Army temi iba atesem nungjagi tasümang 35 bener ao, ta metetdaktsü.
IAF indang 12 Mirage 2000 fighter jets amshia parnoki Pakistan kübok Balakot nung Jaish-e-Mohammed indang training camp ka bomb amshia amak.
Tamasabo Indian media ajanga, IAF-i amakba ajanga kiralongrar 350 shi tepset, ta osang proka liasü.
Ano külen Pakistan-ibo, Balakot nung nisung ka danga masü, aser Indian fighter jets-i arem nung bomb pokloktsüba sülen ajentsüsa akum, ta ashi.
Italy nunger journalist, Francesca Marino-i, nisung 40 nungi 50 shi süogo aser nisung 35 nungi 40 shi yiru, ta metetdaktsü.
Marino-i ashiba agi, Balakot nung alir ka dang nungi lai iba osang tejangja angu.
“Yashi ni osang tejangja nguogo. Osangji noklang shilem nung noklang shidak,” ta Marino-i metetdaktsü.
Marino-isa ashiba agi, India nunger IAF-i Pakistan nung air strike aoba sülen iba tesem jagi Pakistan nunger ambulance aika aru aser Pakistan Army temi ambulance staff tem indang mobile phone meshia ayu.
Laisa, bomb pokloktsüba tesem nungjagi Pakistan Army temi bomb tajemba agi tasümang 35 bener ao. Iba lendong nung asürtem rongnung training agir nisung 12 densema liasü, kechiyong bomb pokloktsüdang parnok camp nungji mejanga liasü.
Asürtem rongnung retired Pakistani Army colonel ka aser tangar colonel ka densema liasü.
Marino-isa, “Taoba mapang Pakistani Inter-Services Intelligence (ISI) ketdangser ka tenüng agi ‘Colonel Salim’ iba lendong nung asü, aser ano Colonel ka tenüng agi Zarar Zakri’ yiru,” ta ashi.
Kasa lendong nung JeM trainer ka tenüng agi Mufti Moeen aser bomb yanglur mongin, Usman Ghani nata densema asü, ta laisa ashi.