Lok Sabha menden 14 prongla onoki akoktsü: Assam BJP

Guwahati, Metsüremi/March 4 (Agencies): Bharatiya Janata Party Assam unit puri 2014 Lok Sabha election nung parnok den longjemer aliba party tem den senteper Assam nung Lok Sabha menden 14 prongla akoktsü temulung lema bilemer.
Hengrabari, Guwahati nung osanebenertem den sensaksemba mapang General Secretary (Organization), Phanindra Nath Sarmah-i ashiba agi, “election atema Bharatiya Janata Party pur terensemshiba tembangogo. Onok prista pramukhs tem taoba küm peyong election atema mapa meranga inyakogo, anungji nüburtem teyari aser onok lokti tentet tashi ajanga 2019 Lok Sabha election nung onoki imlaba ama takok angutsü.”
Congress pur terenemshiba dak sendakba nung telangzüba agütsüdang Sarmah-i ashiba agi, “parnok teti renema lir aser yamaji onoka renema lir. 2016 küm election tembangba sülen nungi tang tashi nung party kechaia parnok election atema renemdar ta shia mali, saka onokibo onok renemdar ta shia aruogo aser onok bendanga agüja inyakdar. Ibayongji 2016 assembly election sülen state nung panchayat polls, council polls ajak nung nüburtemi onok pusemogo. Tang ajangteta aliba dang nungi 2019 küm tajungba ajangtettsü. Tang onoki menden 7 kokteta lir aser onok den longjemer aliba party tem teyari nung onoki menden 14 prongla akoktsü.”
Party General Secretary, Dilip Saikia-i ashiba agi, “Onok terenemshiba tembangogo aser menden 14 prongla koktettsü asoshi sentong yangludar. Onoki Bodoland People’s Front (BPF) pur nem Kokrajhar menden toktsütsü atema telemtetba agiogo aser centre nung lenirtemi iba dak sendakba nung maneni telemtetba agitsü.”
“Menden 13 akoktsü atema onoki taoba küm ana tashi renema aruogo. Grassroot jenjang nungi tenzüka onok indang prista pramukhs, booth president, Shakti Kendra convenor, Mandal Committee, Zila Committee aser morcha o department balalai election atema renemshia aruogo aser tatembang ka dangi arudar. Election agitsüba anogo ya March 8 msera 9 nü sangdongtsü aser iba sülen onoki election publicity tenzüktsü,” ta Dilip Saikia-i ashi.