Arunachal: Longkak aitdang asür kinüngertemi teyari magizüker

Itanagar (Arunachal Pradesh), March 04 (Agencies): Tawa Arunachal Pradesh yimtiba, Itanagar nung Permanent Resident Certificate (PRC) anema longkak aita raraba mapang nung asür asem nungi asür, Tsering Wangdi’er kinüngertemi sorkar dang nungi teyari magitsü, ta metetdaktsü.
State nung longkak aitba mapang nung asür asem kinüngertem nem state sorkari senotsü teyari agutsütsü sangdong, ajisüaka Wangdi’er kinüngertemi teyariji magizüker saka pa tepsetsang security sepaiji dang parnok ket nung agujang, ta takhangba agutsü,
Arishi küm 32, Wangdi aser Biki Ruja (20) na February 24 nü Chief Minister, Pema Khandu’er nija ki anasa longkak aitba mapang nung asü.
Ano arishi küm 22, Russo Tari-a taoba hopta police-i injang yokdang asü.
Ruja aser Tari naprong kinüngertemi state sorkar nungi senotsü teyari aser sorkar mapaji magitsü, saka parnok tepsetter sepaitemji dang parnok ket nung agujang ta takhangba agutsü.
Tanü Itanagar nung aliba Press Club nung osangbenertem den jembidang Wangdi kinüngtsü, Jyoti Kamda-i, la kinüngbuji kibong atema sen aazüker kija liasü aser dokan tilaka lapoka shishiba ajanga kibong rangben mesüba den la tebu teyaridak liasü, ta ashi.
“Senotsü teyari mesüra sorkar mapa masü saka kü kinüngbu atema ni ochi temeden dang akhanger. Onoki senotsü tera dang nguaka onok kanga melungsüa liasü,” ta lai ashi.
Laisa, la kinüngbui state nung lisopurtem atema taküm tenla agutsüogo, ta ashi.
Laisa, sepaitemi injang yokdang la kinüngbu asüba sülen police-i lar kinüngertem nem memetetdaktsüi postmortem agitsü atema tasümangji Assam nung Lakhimpur government hospital-i bener ao, ajisüaka tanü tashi postmortem report mangur, ta jashia metetdaktsü. “Kü kinüngbu tasümang angutsü atema-a ni police tsütsü nungi timtem tulu ajuruogo, ta laisa shisem.