Israel kin ya alima anü tetsü (clock) mesüker

~ A. Imdong Jamir, Sungkomen.

Tsüngremi ashir, Israel kü chir, kü mezüng jabaso An. 4:22 Tsüngremer pa mongpu, pa teka salaba mapang ka tanü asen putu dangi arudar, pai Israel king dang o ya ashir, nenok jenoka aliba pur kar nungjang tatemlen oa liaka kü teka agi anitentsü. Ijip nungi ozü ama Asiria lima nungi goduru ama arutsü. Hosea 11:4. Kibuba Tsüngremi ashir ni Israel tia joko mebelesü. Sannükeri pei san bushiba ama ni prokshia aliba Israel bushitsü. Alima tashi temeteter kaket zülur-i ashir, 1673 küm England nunger kaket zülur Dr. John Owen-i Israel sensotem bendang semer nung prokshia alar süngra nung alirtem pei limai aotsü sangdong osang kaket ka prokshi. Ibai Kibuba Tsüngremi ajungmesoba yimyim tulu liasü. Kechiyong alemli ainkertemi shinzükja akaba ajak kuli tabensa bendener pai adoktsü.
Alima nung nisung chir aikati kanga süngmangteba iba kaket azüng aser Israel nunger shia pei mulungjang nung shishia kongshi ta ashir. Ano kaket zülur kari yamai ashir, Theodore Harzl Yihuda senso tajung ka, pa Switzerland lima asü. Pa lanuwa Russia lima tejenokdak makai nemzüa aliba tia ka nung tetsüi pa dang, tebosang ojalai nü dang tajungshi o ka shidi ya angangjo, ner limai tuang aser yimtiji yanglua nü nübur kümzükang. Iba o yagi jabaso mulungjang nung tashii kongshi. Pei tasola tetsüi kotaker o tajung par kilong nung jembiba o agi jabaso mulungjang, shisatsü tanüla khenyongi ajungmesodaktsü. As. 14:1 Shisa taka tetsür shiai pei ki yanger. Tsüngrem o-i ashir, kipok tesayuba pulua alidak tekümzük lir. As. 11:14. Kipok sayuba mekara nükjidongtem mataloker As. 15:22. Tsüngremer lu nung belemseta inyaker kibong aika pei chir dang kipok sayuba makaba kibong nungi tenüng menük bener shilanger tamangertem aika ola madok asen kibong dak metsüdaker.
Tsüngremer tsükmenatsü lu inyakertem, missionary, pastor, evangelist, counsellor, deacon, mapangsür, tenzükla, mission board evangelistic committee, sarasadem committee item ajak Tsüngremer tsükmenatsü lu nung inyakertem nai nemeta sarasademtsüba, aser ajungshiba agi kiyonger, külem mepurtem yanglushiogo, saka asen kibong kilong nung Tsüngrem o kibong tekülem maliba kibong, alemli Eli putir kanga meranga tenzüksanger kibong nung Tsüngremi o bendang tulu agüja o item ya jembi. Kechiyong pai meteta aliba tai asoshi ni par kibong teti asoshi o bendangtsü. I Samuel 3:13. Eli putir dang Kibubai jashibaji par jabaso asangur tebur tajung anati tenla kidang inyakba tetsürtem (tenzüklatem) den nüktapangta benshi saka pai martsü (kipok sayu mali). Eli putir kibong ama Tsüngrem tenzüker kibong aika nung pei chir ayir, asanguri tai menaba pei tsüraburi meimpangja nempangja jajaba kibong Tsüngremi sempar. Kibong kilong tai temenen, metetsümonga nempangba Eli putir kibong ama yimjak nung Tsüngrem O bendangba kibong aika lir. Item ama kibong nungi Yihuda nunger asangur Theodore Harzli pei tetsü tamangtir kipok sayuba o pai agizüka alima nung zion movement pai ayongmesoa tenzük, iba movement British sorkaria agizüka, yaritsü ta sangdong. Iba sangdong dang Balfour Declaration ta aja. England nung Balfour Prime Minister aliba mapang pai mela nung pa tenüngji agütsü. Ibai 1917 küm liasü. Iba sangdong ya USA, France, Asia lima ajaki agizük. Iba anogo nungi alima nung prokshia aliba bendanger süngra kübok alir ajaki pei lima (Palestine) busia adenshi.
Tsüngremi pei teka agi songlatsü tatemzükba tetemsü mapangji tonger, alima kinük kisang ajak nungi adenshiseper küm noklang 800 shi lia ainkar Isaiai shinzüktsübaji tanü asen tensa nung ataloker. Isaia 43:6 Kibuba Tsüngremi ashir ni anüolentip dang shiokang aser anüdoklentip dang meyipa tesot ta ashitsü. Tsüngremi jembizükba o tajentu tilaka tasüto tilaka mataloki malitsü. Temeim adianutem, Yisu dak amangertem Kibuba Tsüngremi pai toktsüba Israel chir atsüngzüka oa alirtem lenjem ajaki oa bushia par kiyir benjongi anitenba anogoji tanü anogo ya lir. Israel kin par soyim lima Palestine lima bushibaji asenok atsüngzüka oa alirtem Kibubar kiyir benjong tsükmenatsü tzü ajemdak adentsü. Asen Aokin kibongshia tamang rong renemdi ta ayongzüker.