Dimapur District nung PM-SYM scheme tenzükogo

Dimapur, Metsüremi/March 05 (TYO): Tanü Dimapur Deputy Commissioner indang Conference Hall nung district atema Pradhan Mantri Shram Yogi Maan- Dhan (PM-SYM) tenzükba sentong agiogo; iba sentong nung tetushi tejaoakerji DC liasü, ta ketdangsertem osang ajanga metetdaktsü.
PMSYM indang tongmelang agi metetdaktsüdang Asst. Labour Commissioner, Dimapur W. Temwang Konyak-i, PMSYM ya ita shia income sen 15000 mesüra iba dang tekübok angur unorganized sector nung mapa inyakertem atema central sector ka lir, ta metetdaktsü.
Iba scheme subscribe asutsü atema arishi küm tajembaji küm 18 aser timtibaji küm 40 asutsüla; iba ya voluntary aser contribution indang scheme ka lir, kong subscriber ka nem arishi küm 60 nungi ita shia pension sen 3000 agutsütsü, ta pai ashi.
Iba scheme kübok contribution ji subscriber-i shilem 50 aser India sorkari shilem 50 agutsütsü. Iba scheme ya Ministry of Labour & Employment-i ketdangsütsü aser common service centres aser Life Insurance Corporation of India ajanga inyaktsü.
Unorganized sector nung mapa inyakertemji- aluyimertem, kisü-jensürtem, lenmang nung shishialembartem, mid- day meal workers, tekolak nung khu benertem, lungro yangludak inyakertem, tsüngsem yanglushitsürtem, jana bendenertem, kidang yaritepa alirtem, sü shidoktsürtem, rickshaw atsürtem, ali makaia aayangertem, sü-dakertem, shiküp mapa inyakertem, audio-visual worker aser iba dak sendakba mapa inyakertem lir, shirnok ita shia sen 15000 mesüra iba adang nungi tajemba angur.
Parnokji organized sector nung malirtem asütsüla aser EPF/ NPS/ ESIC züngsem masürtem mesüra income tax agutsürtem masütsüla.
Pa/la ket nung Aadhar card den Bank Account/ Jan Dhan Account number den IFSC alitsüla. Tejangrartemi anasatiba CSC centre nung metetpelatsü akok. CSC aliba tesemji LIC of India, Minister of Labour & Employment and CSC websites nungi angutsü.