Arunachal nung World War-II mapang amshiba tayimtsü ka angu

Itanagar, March 05 (Agencies): Arunachal district kübok Lower Dibang Valley (LDV) district nung World War II mapang amshiba America nunger tayimtsü ka tenemi aturtemi nguogo.
Arishi küm 24, Pangka Linggi aser Sathi Meto (24) nati, tena tenemi atudang tenati tayimtsü ka angu, aser iba nungji ‘USA’ ta zülur liasü, ta metetdaktsü.
“Iba tesemji anogo ananü tashi tetsüng agi Mehao awatsüng adena orr ang lir,” ta tenati metetdaktsü. Tena ket nung mobile phones maliba agi noksa metangoktet, ajisüaka tenati kuli atema oset kar bener aluba sayuogo. Tenati bener aluba osettem rongnung injang aser spoon kar dena liasü, aser tenati ibaji anogo ishika tejaklen IMCLS & RIWATCH Museum ket nung agutsüogo.
“Tang mongpu nungbo iba tesem jagi moutettsü, kechiyong rürjep agi labanger alitsü. Tan ita tatembanglen künati iba tesem jagi atutsüa akok,” ta tenatisa metetdaktsü.