Vir Das-i world tour atema sentong renemer

Mumbai, July 10 (Agencies) : India nunger actor-comedian, Vir Das-i Creative Artists Agency (CAA) den külemi alima tesem balala sema senzütsü sentong renemogo.

CAA ya international artiste management agency ka lir aser Vir-i iba sentong asoshi onüktem zülutsü tenzükogo.

“Ni alima jenjang nung shilem agitsü asoshi kanga mazüngi zülur. Alima tesem balala sema senzütsü aser ibaji atema ni CAA den yariteper. Tang onoki tesemtem reprangdangdar aser linük aser yimtitem shimtsü” ta Vir-i sangdong ka ajanga metetdaktsü.

CAA ajanga Jimmy Fallon, Billy Crystal, Jon Stewart, Whoopi Goldberg, John Cleese aser Whitney Cummings nungertem ajungkettsü.

“Nai keta asenertem den külemi tarensen nung densembaji kanga junger aser talisa Indian comedy ajungkettsü atema sabang anguaba atema kanga pelar,” ta Vir-isa shisem.