Rahul Gandhi-i Tripura semdangtsü

Agartala, March 6 (Agencies): AICC president Rahul Gandhi-i March 20 nü Tripura semdangtsü ta Tripura Pradesh Congress Committee ketdangpurtemi ashi.
AICC president shimba sülen Rahul-i tang mezüng atema Tripura semdangtsü.
Tawa tu pai Tripura chubar kibong nungi Pradyot Kishore Debbarman Congress party president inyaktsü atema shim.
Rahul-i Pradyot Kishore aser Tripura Pradesh Congress committee lennirtem den senden balaka amentsü aser iba sülen Agartala nung Lok Sabha election atema nüboyimba sentong ka nung o jembitsü.
Tripura nung Congress president tasen shimba ajanga party tashi itshiogo aser taoba chief minister aser tang teinyakdak BJP health minister Samir Ranjan Barman-ia Congress nung züngsem kümogo. Maneni tanga lennirtem aika Congress nung adentsü ta osang ajanga ashir.
Tripura nung BJP-i chichiba election ajurutsü. Maharaja Pradyot-i Pradesh Congress committee president inyaktsü tenzükba ajanga regional tribal party tem nungi züngsemtem onok den adentsü, ta TPCC lennir Rahul Saha-i ashi.
State nung BJP den yariteper Indigenous Peoples’ Front of Tripura (IPFT) nungi züngsem aika Congress nung adentsü renemogo ta paisa ashi.
Tripura ajungalen nübortem pelateper kechiyong lisopurtemi tang ang chichiba lennir ka nguogo aser iba jagi party balala nungi züngsemtemi Maharaja Pradyot Kishore-i jembiba sentong aika nung denogo, ta Saha-isa ashi.
Maharaja-i Rahul Gandhi dang Tripura semdangtsü atema jaokba agizük, ta Congress party osang ajanga ashi.
Maneni, Rahul Gandhi-i semdangba sülen party-isa AICC general secretary Priyanka Gandhi jaoka sentong nung jembidaktsütsü telemtetba agiogo.