Congress lenirtemi G-20 linüktem nungi ketdangsertem ajuru

New Delhi, Metsüremi/March 06 , 2019 (Agencies): Tanü New Delhi nung Congress Party Tir, Rahul Gandhi leniba nung party nung bangdak lenirtemi G-20 linüktem nungi ketdangsertem (Ambassadors/High Commissioners) ajurua Pakistan tsütsülen nungi arrtsü adena arua kiralongraba tebilemtsü lemsatepogo.
Linük yimtiba, Delhi nung aliba hotel ka nung ayongzükba sentong nungji taoba mapang Ato kilonser, Manmohan Singh, UPA Chairperson, Sonia Gandhi aser Congress Party nungi lenir, Anand Sharma nungera densema liasü.
Iba senden nung Congress party nungi lenirtemi party indang foreign policy tangatetba lemsatepa liasü.
Iba senden nung USA, China, Russia, Bhutan aser Nepal linüktem densema linük balala nungi ketdangser 30 shi den Congress lenirtemi shisa lemsatep, aser iba senden nung tawa February 14 nü Jammu & Kashmir kübok Pulwama nung kiralongrartemi CRPF sepaitem amakdang sepai 40 tepsetba tatalokba indanga jembiogo.
Iba senden tembangba sülen Diplomatic Corps Dean, Hans Dannenberg Castellanos-i, “Tembartem den sentong tajung kaogo,” ta metetdaktsü.
Iba senden tetezü keta agitetogo, ta shia Congress lenir Sharma-i, “Külem tebilemtsü onüktem nung o lemtepogo. Kiralongra anema raraba nung onok longjema lir,” ta metetdaktsü.
Iba senden ya February 15 nü ayongzüka liasü ajisüaka February 14 nü kiralongrartemi Pulwama nung sepaitem amakba ajanga senden amentsü anogo atsülanga liasü.
G-20 mesüra Group of Twenty ta ajaba telok ya International sabang nung tentetba tentet ka lir, kong linük 19 den European Union densema lir.