Delhi health minister-i dengue atema rongdak senden ayong

New Delhi, September 13 (Agencies): Linük yimtiba nung dengue tashidak asameyangtsü asoshi Delhi Health Minister Satyender Jain-i Honibar nü rongdak senden ka ayonga kaogo. Iba sülen minister-i mozü ki ka semdangba mapang yangji aliba manemertemi pa luja jembia liasü.
“Iba senden nung dengue tashidak Delhi nung prokshia meyoki nokdangtsü asoshi lemtepa liasü. Iba tashidak agi tonger mozü kidangi arur ka danga meyipa meyoktsü atema mozü ki ajak nem metetdaktsüogo,” ta Jain-i senden temer külen media den jembiba mapang ashi. Iba senden nung district magistrates (DMs) aser divisional commissioners (DCs) ajak dena liasü.
“Dengue den raratsü asoshi mera shitak agitsü aser iba tashidak asadangba maparen nung temetettsütem ajak parnok den lemsatepogo,” ta pai ashi.
Iba tashidak agi atonger nisung aika akümba ajanga ozü kidang yipten agi matai kümogo.
Arishi küm tenet, Avinash dengue agi shiranga asüba sülen centre aser Delhi sorkar nati nija mozü ki pongu dak tenük yoka bushisündang mapa tenzükogo. Avinash ya kanga mejungi shiranga mozü ki-i aodang mezüngbo mozü kidang momungdaktsütsü ta shia liasü. Pa asüba sülen tsürabur anaprongla taoksa marem soseta asü.
Iba tanubosang mozü kidangi teyari bushia arudang magizükba atema item mozü ki pongu dang Delhi sorkar parnok registration cancel sütsütsü metetdaktsüogo.
Iba senden temer külen Jain-i Sanjay Gandhi Memorial Hospital semdangdang dengue tashidak agi shiranger aser yipten tazüng kwi lir ajakji asadanga liasü.
Osang ajanga ashiba agi, pai mozü ki semdangba mapang yangji munga alir shirangertemi, pai kechi inyaktettsü ta luja liasü.
“Yipten shia shiranger anana lir. Parnoki shiranger ajak agizüker,” ta Jain-i mozü ki semdangba sülen metetdakja liasü.