NID atema State Task Force senden amen

Dimapur, March 6 (TYO): National Immunisation Day meyipa reprangshimtsü atema Directorate of Health & Family Welfare-i State Task Force senden ka ayonga amen.
Bodbarnü Principal Secretary, Health & Family Welfare Nagaland indang conference hall nung Principal Secretary, Health & Family Welfare, I. Himato Zhimomi menden ser senden amen.
Sentong nung Mission Director, NHM, Dr. Kevichusa Medikhru-i tesentepertem pela agizükdang department nung ketdangsertem aser ano department balala nungi züngsemtem adenshiba atema pelaba metetdaktsü.
Taküm February ita technical khuret kar aliba ajanga Intensive Pulse Polio Immunisation magitet aser ibaji March 10, 2019 tashi thinen. Iba sentong ya 1995 nung tenzük, ta Dr. Kevichusa-i ashi.
Social Welfare, School Education aser Information & Public Relations department temi parnok akokba tashi mapa inyaka arur. Iba dak sendakba nung department ajaki iba mapa nung yariteptsü ayongzüker, ta paisa shisem.
Nagaland nung IPPI mapa inyakba indang osang lemsatepdang SIO, UIP, Dr. Ritu Thurr-i ashiba agi, IPPI atema booths ajak agi 2244 lir. School Education aser Social Welfare department temi Head count exercise agir aser iba nung school tesayurtem, Anganwadi aser ASHA workers-i tongti shilem agir, ta Dr. Kevichusa-isa metetdaktsü.
SMO, WHO, Dr. Shiela Longkumer-ia taoba NID (IPPI) agiba indang powerpoint presentation ka sayu.
India nung polio samatsütsü atema inyakba mapa nung takok ngua arur. 2011 küm tatemsabuba polio tashidak indang osang WPV nem sangoktsü, 2012 küm polio endemic countries nungi India züngdok aser 2014 küm India-i polio-free certification angu, ta Dr. Shiela-i ashi.