Mozü aser yi noktangtsü atema sentong ka agi

Dimapur, March 6 (TYO): Dimapur nung aliba Excise Commissioner indang office nung tanü Prodigals’ Home aser Excise department, Dimapur Nagaland longjemer ozüngi memelaba mozü aser yi indang sentong ka ayongzüka agi.
Nagaland ya ‘Golden Triangle’ ta ajaba tesem aser talisa Myanmar den kanga anasatepa aliba ajanga mozü shilebenertemi state adena senzür. Nagaland-i mozü bener aruba lenmang tongtibaji Manipur nungi National Highway 39 ajanga bener aruba lir.
Ano, Assam nungi Nagaland-i mozü bener arur. Manipur, Assam aser Myanmar den arrtsü junga maliba ajanga mozü shibelenba mapa menokdangteter, ta Deputy Commissioner of Excise (Narcotic Cell), S Chanlei Angh-i tanü o jembidang ashi.
Dimapur aser Assam (Lahorijan area) kanga anasatepa aliba yong yi aser mozütem noktangtsü atema inyakba mapa nung timtem aika ajurur. Tang shibelenertemi inyakbaji Assam nung mozü aser yitem bendena ayutsü aser itemji Dimapur-i terara bener arur, ta paisa metetdaktsü.
Ano, tanü-asüng inyakyim tasen ka lir aser ibaji mozü aser yi shibenertemi tanurtem ajanga belendaktsüba lir. Iba mapa inyaker ya mashii meputeter, ta Chanlei Angh-isa shisem.
Talisa Excise department ket nung nübo peria maliba ajanga mozü aser yi noktangba mapa shitak meinyakteter, ta paisa khuret ka lemsatep.
Nagaland sorkari ‘Total Prohibition Act 1989’ yanglu, ajisüaka tanü tashi mozü aser yi amshiba khuret mekokteter. Iba ajanga sorkarisa ‘The Nagaland State Drug Abuse Prevention and Treatment Policy’ yanglu, ta Social Welfare department nung ketdangser kati ashi.
Mozü aser yi chia-ajemba ya medically recognized disease ka aser iba tashidak ajanga kija, kibong aser lokti nung timtem agütsür ta iba policy ajanga agizüker. Achiajemba noktangtsü, anepalutsü aser lokti nung tanaben anioka liyonga odaktsütsü atema inyakyimtem lateta inyaktsüla ta policy nungsa lateta lir.
Sorkar, Arogo aser civil society longjemer yi aser mozü indang khuret koktettsü atema mapa inyaktsüla. Iba tebilemtsü atema political party lennirtemi party telemsa toktsür ajak ajangzüktsü atema külemi mapa inyaktsüla, ta tanü sentong nung adenertemi ayongzük.
Sentong nung Dimapur Deputy Commissioner, Kevekha Kevin Zehol-i o jembidang “asenoki asen lokti nungi mozü aser yi khuret agientsü atema shilem agitsüla. Asenoki khuret nung masü saka telemtetba agiba nung shilem ka ka asütsü merangdi” ta ayongzük.
ADCP Crime, Dimapur Relo T Aye-ia mozü aser yi dak sendakba ozüngtem aser police-i inyakba mapa balala indang osang lemsatep.