IAF-i tepsetba kiralongrartem kuli meshir

New Delhi, March 6 (Agencies): Indian Air Force-i Pakistan kübok Balakot nung Jaish-e-Mohammed tesep makdok ta ashiba atema Pulwama nung asür sepai kibong anati kuli meshir.
February 14 nü atalokba lendong nung CRPF sepai 40 asüba nung Shamli nungi Pradeep Kumar aser Mainpuri nungi Ram Vakeel na dena liasü.
Pulwama nung sepaitem amakba tayang küpzüka India-i Balakot nung JeM indang teseptem amak ta Centre-i ashir saka opposition-i masüa ta tai tongloktsür. Iba ama mapang ka nung sepai ana kibongi sorkar dang kiralongrartem indang mang sayuang ta kuli meshir.
“Asen dak atalokdang (Pulwama) asenoki nisung kar indang teka, kar indang tetsüng ama noksatem nung angu. Asenokia par tsütsü asüba indang noksatem angutsüla. Bomb amshia amakba atema nisung kari yakta dang tenüng agiba metetdaktsü. Tayimtsü amshia maker asütsü saka kong amak? Iba kuli tejangja agütsütsüla. Kuli magütsü tashi onoki kodaser agizüktsü?” ta Ram Vakeel tenu Ram Raksha-i ashi.
“Pakistan-i parnok takoksa kecha majuru ta ashir anungji kodaser onoki kuli medeni kiralongrartem tepsetogo ta amangtsü? Onok dang kuli sayuang, aser aji asü nung dang onoki temulung anisüngzüktsü aser küdi asüba tayang küpzükogo ta shitettsü” ta laisa ashi.
Shamli nung Pradeep Kumar tetsü-i kasa kuli meshir. “Onok temulung masür. Pulwama nung jabaso aika asü saka Balakot nung shinga masü. Par tsütsü tasüba kecha mali. Osang tejangja mali, onoki iba ya TV nung angutsüla. Onoki kiralongrar tasümangtem reprangnür” ta Pradeep tetsü Sulelata-i ashi.