PM Modi anema bushisüngdangtsü kuli nguogo: Rahul Gandhi

New Delhi, March 6 (Agencies): Centre sorkari Supreme Court nung Rafale indang tenangzüktep agiba kulikakettem Defence Ministry nungi auyaogo ta ashiba sülen Congress president Rahul Gandhi-i iba ken o nung Prime Minister Narendra Modi anema bushisüngdang asütsü kuli peria lir ta ashi.
Attorney General KK Venugopal-i Supreme Court nung iba osang lemsatepba ya kuli samatsüba aser mimbanga ayuba inyakyim ka lir ta Congress-i Centre aitsür.
“Rafale ochimashi ken o nung Prime Minister danga asüngdangya kuli peria nguogo. Iba ochimashi mapa ya pa dak nungi tenzüker aser pa den tembanger. Kanga dang tongtipang Rafale kulikakettemji sorkari auyaogo ta ashir, iba ya kuli samatsüba aser mimbanga ayuba inyakyim ka lir” ta Rahul-i ashi.
Defence Ministry ket nungi Rafale dak sendakba kulikakettem auya aser petitioners-i agütsüba kulikakettemji “secret” ta zülua liasü anungji ibaji Official Secrets Act alema lir, ta Centre-i tanü Supreme Court nung ashi. Iba sülen Rahul-i PM Modi aitsü.
Iba atema bushisüngdang ka tenzükogo aser FIR ka benokogo, ta Attorney General-isa okadak ashi.
Tanü Chief Justice Ranjan Gogoi-i anir züngsem asemi akümba bench kati Rafale dak sendakba ken o angadang.
Tanü Congress national spokesperson Randeep Surjewala-ia Rafale tenangzüktep agiba nung ochimashi aser tim mesüi inyakogo ta tai tongloktsü aser paisa PM Modi anema FIR ka benoktsü mapang tonga aruogo ta ashi.
“Rafale maparen nung ochimashi aser mashii inyakba yimjak nung adokogo. Modi-i Prime Minister indang office tim mesüi amshi aser sorkar senpong akoksadaktsür Dassault Aviation nem tajangzük tulu agütsü” ta Surjewala-i ashi.