Political party temi Arunachal CM anentsütsü akhanger

Itanagar, March 6 (Agencies): Arunachal Pradesh Congress Committee (APCC), People’s Party of Arunachal (PPA), Janata Dal (Secular) aser National People’s Party (NPP) teshimtet telok kati Bodbarnü Arunachal chief minister Pema Khandu mapa nungi anentsütsü atema takhangba agütsü.
Tanü parnoki Raj Bhawan nung Arunachal Pradesh governor B. D. Mishra den ajurutep aser anogo asem tsüngda Khandu chief minister menden nungi anentsütsü atema mapang latettsü.
“Onoki Governor dang pa nem agüja aliba tashi aser inyakyim amshia Pema Khandu CM menden nungi agientsü atema takhangba agütsü” ta Arunachal Pradesh Congress president Takam Sanjoy-i ashi.
“Tawa Permanent Resident Certificate (PRC) anema lungkak aitdang nisung khasetba tatalokba nung army maden ta onok olemtepdang Governor-i jangjajangja shiogo. Home minister-ia pai injang akhatsü tetuyuba magütsü aser iba maparen memetet liasü ta jangjatsüogo. Anungji injang khatoktsübaji chief minister mesüra deputy chief minister na rongnung kati tetuyuba agütsü asütsü. Lanur asem khasetba tebilemtsüji tenati abentsü” ta Sanjoy-isa ashi.
Maneni union minister of state for home Kiren Rijiju-ia Itanagar-i army yokba atema mapa nungi anentsüla, ta Sanjoy-i takhangba agütsü.
Taoba chief minister aser JD(S) lennir Gegong Apang-ia Sanjoy-i ashiba ama “chief minister Khandu-i tetuyuba agütsüba ajanga lanur asem taküm sama aser aika yiru, anungji pai CM menden yutsütsüla” ta metetdaktsü.
Iba mapang mapa lemzüka aliba police ketdangser ana mapa nungi anentsütsüla, ta Gegong Apang-isa ashi.
Police-i khasetba lanur asemji taküm bendanga agütsürtem lir anungji parnok asoshi nüngshilung ka yanglutsüla ta onoki governor dang ashi aser pai ibaji junger ta agizük, ta paisa shisem.
“Khandu-i aniba BJP sorkari Arunachal ya non-tribal state ka kümdaktsütsü meranger aser lanur asemji khasetbaji sorkar mapa mesüra senotsü teyari agütsüba ajanga memenoktettsü” ta PPA president Khafa Bengia-ia ashi.
“Taoba sorkar mapang Raj Bhawan anasa mithun (Bos Fontalis) ka tepsetdang Arunachal nung President’s Rule alitsü benok. Tang tai maket nisung asem khasetaka state sorkari kasa mapaji inyaktsü nungnanger” ta Bengia-i President’s Rule alitsüla ta takhangba agütsüdang ashi.
Tawa state nung mepetmesü adokbaji yimtenren mapa adenba ajanga liasü ta Chief minister Khandu-i ashibaji tiyazü ta State NPP lennir Tangya Byaling-ia ashi.
“Khandu lenisüba kübok Arunachal nung tensa kanga mejungi aküm aser nisung asem tashi asüba den aika yiru. PRC anema lungkak aitba ya yimtenren mapa ka ta CM-i ashibaji public nungi vote angutsü atema dang lir” ta Byaling-isa ashi.
Paisa February 24 nü Martyrs’ Day amungtsü atema state sorkari osang sangokjang ta takhangba agütsü.