Mokokchung District kübok MGNREGA 2015-16 nungi 17-18 tashi nung tamamangtsü lir (BDO/RDO/APO 34 deputation/contract basis nung lir)

~ Odi Jamir & S. T. Yapang Lkr.

Yimdaklir sensaker asoshi senotsü aruba tajungtiba department-ji Rural Development department lir, yang nungi aruba MGNREGA scheme nungi sensaker asoshi ayangtsü sen arur, iba nung kangasa ochi mashi aliba puteter, ibaji 2015-16 nungi 2017-18 tashi Utilization Certificate RTI telangzüba NO.DRD/RTI/AA-9/2018-19 Dated Kohima, the 12 Feb 2019 ajanga puteter.
Asen Nagalima tia ajaki angateta lir, ibayongji nüburtemia parnok meyong nungi 40% tashi ketdangsürtemi aluzük agibo arema dang liasü/lir, saka joko bushidanga ao nung 80-85% tashi ketdangsürtemi aluzükba ama mapa o sen na meputepi puteter.
Iba den BDO/RDO/APO 34 Deputation aser contract basis nung lir (35 liasü, saka ka resigned süogo). Mokokchung District nung BDO 9 nungi 6 deputation aser contract basis nung aliba RTI telangzüba NO.RD/RTI-82/2017 Dated Kohima, the 7 Feb 2019 nungsa shia lir. Saka onoki nübur aser department dang mepishibaji parnok temeten liang teli, parnok anema iba küm yabo keno kecha mebenoktsü mepishir, aser transfer-a meyokdaktsünür, kechiyong parnok lia parnoki inyakba mapatem reprangshitsü aser aibelena aliba putetra, item ketdangsür nem item senotsüji meyipdaktsütsü.
VDB/Council kari aibelener ketdangsür menen tongzüknüa lira lenmang sadema lapoktsür, aser nenoki sen 100% menoktsüsa akümtsü. Kechiyong iba osang züngshiliyongi aibenela alir ketdangsür aika tongtonglatsü atua kechiang meshi Council Chairman aser VDB den jungteptsü aser mesüzüktsü lenmang bushiteptsü. Anungji onoki ya ashir, nenok meyong chitsüa aliba nungi nenok sen tera ngur iba keno tembangtsü bilemra aji nenoki menoktsüsa akümtsü, ibaji aibelener menen nenoki tongzüker asütsü. Rongsen meimer karbo Laishiba nung Gehazi dak Naman zütsüra temlokba ama asütsü.
Koba maparensa meshitaki ali itemji ketdangsürtemi tejangja meteta alinungji iba osang sangdongba sülen anogo 20 tsüngda yimdaklir nem sen 60% meyipa agütsütsüla, yim kari 100% meshinüra aji onoki menokdanger, onoki 60% nung sotba tetezüji aibelener dang taochi sayuba tamaitsü lir, saka aibelener jaki tashi mangara onok nübutsüka tetsüngteben bulua RTI Act ajanga Inspection arura aser idangji taiji putetra idangjibo 100% bushitsüsa akümtsü. RTI Act nung shia aliba ama nübur mashi kati RTI asüngdanga bushipura sütettsü, saka nüburtemi iba tashi mamshiba agi ketdangsürtem aibelentsü lenmang tesademba lapoktsür.
Shir yimtsüng nüburi senden (public meeting) ayonga iba MGNREGA scheme dak sentakba senotsü bushitsü bilemer parnoki onok jaokra onok arua shilem agitsü mulunga lir, onoki Mokokchung District kübok block 9 rongnungi block tenet indang 2015-16 nungi 2017-18 tashi senotsü amshiba tejangja WhatsApp telok balala aser Facebook nunga ‘RTI Initiative Nagaland’ telok nung inoktsüa lir asünungji nenok sasa reprangdanger onok dangi osang yokangma. Ano onok dangia WhatsApp yoka ner block indang meshitsü akok 9856714829/9612800973/9089069800/9862336389. Tanüngba block anajia memenui lemsateptsü.
Ano ketdangsürtemi meteta alitsü tim kaji tang nungibo yimdakliri memtet project kecha meyanglutsüla aser yimdakliri memteti süngdonglidong alia bener arua atemtsü magütsütsü, yimdaklir den asüngdangtepa aser par yimdak apetba süngdonglidong dang atemtsü. Nenok sen aatsü asoshi nenoki mulungba nung yimdaklir sen amshira iba khuretji nenoki abentsü.
Tang Mokokchung district kübok MGNREGA nungi sen arua lir, yangji yim shia anogo balala lir, saka yim shia ishiba agia 60% agütsütsüla aser tagizükeria yamaji agizüktsüla, yim kari 100% meshinüra aji nenok mulung, kechiyong aji nenok sen lir, onokia yangji akokba tashi yaritsü, ano ketdangsür kari sen menua magütsüra pa/la anema keno benoktsüsa akümtsü, aji tang nungi onoki anogo züngdar.
Aibelener ketdangsürtemi yimdaklir amokmerentsü lenmang ana lir; kaji ner yimdak aliba Job card talila zülusema lira aji ajemtsütsü, tanabubaji tarutsü nung tanga yimtem sen aika angudang nenok tajemba angutsü ta amokmerentsü, saka nenok yangji tsübua teli, ketdangsür shibai yamaji shidir pa/la anema iba MGNREGA tetenzük nungi tanü tashi reprangdanger parnoki meshia aliba sen 100% meshizüktsü, aji onok mapa asütsü. Saka onoki job card tiyazü yanglutsü majungshir oda shitak yanglutsü aser asenoka sen shitak 100% meshitsü aji ajak dang tajungtiba lenmang.
Tanü ochimashirtemi nübur aser yimden Jung amai amshia parnok kümzüker, ibai Nagalima tensa tamajungba mapang Indian army-temi inyakba nungi ajizükba lir, mapang ka Naga linük tenzükertemi India Army makra iba anasa alir yimtem tai maketertem züka merenshili asü, anungji yimdaklirtem aochidang linük tenzükertemi aiben atsüanem akatsüsa aküm.
2015-16 nungi 2017-18 tashi MGNREGA scheme ajanga inyakba maparen nung temulung malemtsüsa aliba kar yangi lemsateper, nüburi meteta alitsü asoshi yim kar dang agiteta lemsateper, tang ya Ongpangkong South aser Changtongya Block ana ya tama reprangshitsü, tanüngba block-temji taruba nung kongshitsü;
. Changtongya block kübok Changtongya yimtiba nung anogotsübu makaba tesem nung anogtsübu tutsüba asoshi sen 14,12,693 sayua lir. Changtongya Yimsen 2016-17 küm indang sen agi lenmang pungu mesüra punguben black topping aoba sayua lir, saka yimtsüng telungzük nung black topping-ji lenmang asem dang lir. Unger yimdak retaining wall aika yangluba sayua lir, anungji ibaji tonga oa reprangdanga asadangtsü. Kasa iba Changtongya Block nung 2016-17 küm maparen inyakba Utilization Certificate ajanga ashiba agi Changtongya yimtiba- Rs 1,49,99,430 Yangyimsen- Rs 1,86,69,068 Changtongya Yimsen- Rs 46,13,968 Akhoya- Rs 81,97,177, Unger- Rs 1,03,00560, Kilengmen- Rs 73,32,718 ta terenlok mapa inyakba den yimdaklir nem taa agütsü ta shia lir. Item senji ochishia yimdaklir nem agütsüa ali asübo alima koda renloker lila.
Ongpangkong South kübok Chungtia nung ‘Widening of Chungtia to Kobulong Agri-link road’ ta sür sen 18,90,280 indokba sayua lir, ano külen reprangdangra “Improvement of road from Impur to Chungtia” ta sür Crore 35 Work & Housing Govt. of Nagaland NO.WH/R&B-59/2018/ISC,EI&CRF shiti nungsa shia lir (iba sen ya release sür masü mejangja) iba lenmang ana ya kasa asü balala ta metettsü asoshi tsüngdong arua reprangdang nung dang putettsü. Kasa iba Ongpangkong South nung 2016-17 küm indang sen agi maparen inyakba Utilization Certificate ajanga ashiba agi Longkhum- Rs 1,48,69,393, Khensa- Rs 1,77,01,806, Chungtia Rs 2,07,94,680, Aliba- Rs 62,78,700 yamaji sen paikaji amshia terenlok mapa inyakba den yimdaklir nem taa agütsü ta shia lir.
Tekalen shia aliba dak alaka yim kar nung retaining wall kar onoki reprangdangogo, itemji inspection mapang jungjunga asadangtsü, tang tenük agi reprangdang nung rata lung ka nung sen 1000 nungi 3000 tashi adoktsüsa lir, kar nung mangu, asü tenük agi mangtsüsa nung yanglua akar itemji inspection mapang dang putettsü. Ano ‘Toilet to household’ ta sür sen aika inoktsüa lir, saka itemji kasa PHED nungia agütsüba sayua lir aser PHED puri agütsübajiang shitakba asütsü ta onokibo bilemer.
Yim ka nungi minister adokaka par yimdak terenlok inyaktsü asoshi sen corer junga bener arutsüji tasak lir, saka ner yim opposition nung liaka taoba küm asem indang meyipa meshi nung yim tulutembo corer anana aser yim tilatem corer kaka tabosa meshitsüsa akümtsü. Ner sen ner atep nung rema yur kechiba nenok meshimetsüa senzütsü mesüra yaseta alitsü?.