House anaparong nung CAB agizüktsü atema inyaktsü: BJP

Kohima, March 07 (TYO): Linüki melunga Parliament House anaprongla nung Citizenship Amendment Bill (CAB) 2016 agizüktsü atema BJP-i inyaktsü, ta BJP Minority Morcha National president, Abdul Rasheed Ansari-i metetdaktsü.
Parliament nung CAB anema nokdakba nung BJP minority morcha-i North Eastern States pusemtsü asü, ta asüngdangba langzüdang Ansari-i, “Asen linük ya democratic lokti ka lir aser ozü party-a democratic party ka lir aser onoki democracy nung tamang akar,” ta ashi.
“Party tongtii onük aika nung Northeast dang asüngdangogo aser ano asüngdangtsü, aser o lemtepba sülen Parliament House anaparongla nung iba Bill agizüktsü atema inyaktsü,” ta pai metetdaktsü.
Tang mezüng BJP Nagaland State Minority Morcha senden nung adentsü atema yashi pa Kohima-i aru aser Brihostibarnü osangbenertem den pai jembia liasü.
Paisa, taoba sorkari Ministry for Minority Affairs nem sen crore 3400 dang lemzüktsü, ajisüaka BJP-i aniba NDA sorkaribo sen crore 4700 lemzüktsü, iba dak alia minority nungi kaketshirtem nem scholarships agutsür aser Northeast tesem reprangtsü atema temeja department ka tenzük, ta metetdaktsü.
Centre nung Modi sorkar nungittsü, ta shia Ansari-i, “Iba sorkar maneni alitsüla; linük nem security agutsütsü, tesünep alitsü, terenlok alitsü aser linük nümatangtsü atema maneni tanaben iba sorkar shimtsüla, ta BJP Minority Morcha-i bilemer,” ta metetdaktsü.
Sammelan indang metetdakja pai, Nagaland nung minority morcha nung tongti tamangba loktitemji- Hindu nunger, Muslim, Sikhs aser Malayali nunger lir, aser parnok dang taruba Lok Sabha election nung PDA teloktep nungi candidate yaritsü atema mapang agutsüteta nübo ayimtsü ajungshiogo, ta metetdaktsü.
Pai ashiba agi, parnok dang kibok shia sema nüboyimtsü, sorkar schemes nungi tajangzük angurtem ajurutsü, tamangba yimsü lenirtem aser shisashirtem ajurutsü metetdaktsüogo.
Paisa, sammelan nung state nung minority tem tebilemtsü onüktem nung o lemtepba den külemi tribals aser sensakertem ajungkettsütsü atema sorkar benokba scheme balala indang lemtepa liasü, ta ashi.
“Party aser morcha atema tongti teinyaktsüji nüburtem tenzüktsü aser item schemes junga benoka inyakba ajanga tajangzük angutsüpurtem nem tajungzük ngudaktsütsü asoshi lir,” ta pai ashi.
Telok kari linük anemba mapatem inyaker, ta shia Ansari-i, “Linük security aser linük nüma atangtsü atema Ato kilonser Narendra Modia leniba nung NDA sorkari inyakba mapatemji onoki pelaa agizüker,” ta ashi.
Ansari-isa State minority unit dang parnok nüngdak balala aser tebilemba onüktem agujang, kechiyong itemji tang terenemdak BJP National Election Manifesto nung inoksemtsü, ta metetdaktsüogo.
Osangbenertem den jembiba mapang nung BJP Nagaland Minority Morcha president, Rajiv Jha-a densema liasü.
Pai ashiba agi, tanga North East state tem nung aliba ama Nagaland nunga Minority Commission amenoktsü atema mepishiogo.