Ayodhya ken o nung SC telemtetba lenirtemi pelaa agizükogo

New Delhi, March 08 (Agencies): Ayodhya nung Ram Janmabhoomi-Babri Masjid mangatettep ken o bentettsü atema Supreme Court-i retired Supreme Court judge F M I Kalifulla leniba nung luden ka tentettsü atema telemtetba agi, aser iba telemtetbaji telok balala nungi lenirtemi pelaa agizükogo.
BSP tongti, Mayawati-i twitter ajanga, “Ayodhya ken o bentettsü atema Supreme Court-i luden tentettsü atema tuyubaji pelaa agizüker. Tesendaktep nung taneptsü angutsü atema Court-i lenmang bushibaji pelaa agizüker. BSP-i ibaji pelaa agizüker,” ta ashi.
Iba luden nung züngsem, Sri Sri Ravi Shankar aitsüba olen ka nung AIMIM tongti, Asaduddin Owaisi-i, Shankar-i shinga pu mesemi inyaktsüla, ta ashi.
Osangbenertem den jembidang Owaisi-i, “Shinga pu mesemi inyaktsüpur ka Supreme Court-i shim nung tajungba süla. Iba luden nung züngsemtem rongnung kati Muslim nunger amokmerena, India ya Syria linük akumtsü, ta jembiogo. Iba luden nung alidang pai item oji mebilemtsü ta ni imlar. Onoki iba telemtetba pelaa agizüker,” ta ashi.
CPI(M) lenir, Brinda Karat-i, tamalen luden balalai inyakba nung tamakok angu, ajisüaka tangbo Supreme Court-i ketdangsüa reprangtsü aser court-i aoer telok ajaki iba telemtetba nung bangjema melunger, ta ashi.
Muslim litigant, Iqbal Ansari-ia court tetuyubaji pelaa agizükogo. Pai, “Iba tetuyubaji ni pelaa agizüker. Küm aika jembia aruba ken o ya tatembang nungbo yimjung nung tembangdaktsüner, aser ibaji ajak taginüba,” ta ashi.
All India Babri Masjid Action Committee Convenor, Zafaryab Jilani-i, parnoki akokba tashi iba luden den yariteptsü, ta ashi.
Iatem maparen tembangtsü atema tanü Supreme Court-i luden nem hopta 8 agutsüogo.
Iba luden nung züngsemtem rongnung Sri Sri Ravi Shankar aser senior advocate Sriram Panchu na densema lir, ta Chief Justice Ranjan Gogoi-i aniba Constitution Bench-i metetdaktsü. Ano nüngdak dang süra züngsem bendenloktsü, ta bench-isa metetdaktsüogo.