Abhinandan nem Param Vir Chakra agutsütsüla: Palaniswami

New Delhi, March 08 (Agencies): Tanü Tamil Nadu Chief Minister, Edappadi K Palaniswami-i Ato kilonser, Narendra Modi dang Wing Commander Abhinandan Varthaman nem linük nung tematiba military award, Param Vir Chakra agujang, ta mepishiogo.
Shidi ka ajanga Palaniswami-i Ato kilonser Modi dang, Tamil Nadu nungi IAF pilot, Abhinandan-i koda masüba tensa nung melung lemteta tasütait tanela sayuogo, anungji pa nem highest military award agutsütsü tetemsü, ta shia lir.
Paisa, Ato kilonseri yimtenren ajanga inyakba aser alima linüktemi telung nung Pakistan dang mepishiba ajanga Pakistan-i Abhinandan Varthaman chiok, ta ashi.
“Koda masüba tensa nung Wing Commander Abhinandan Varthaman-i melung lemteta tasütait tanela sayuogo, aser ibaji ajanga pai linük nübur aika melung koktetogo. Tasütait tanela sayuba atema pa nem India nunger highest military award, Param Vir Chakra (PVC) agutsütsü tetemsü,” ta chief minister-i ashi.
“Ni India sorkar dang Wing Commander Abhinandan Varthaman nem linük indang highest military award, Param Vir Chakra agujang ta mepishir,” ta paisa ashi.
Palaniswami-i, Abhinandan-i aniba MiG-21 Bison tayimtsüi Pakistan nunger Air Force fighter (F-16) tayimtsü khazüka yok, iba sülen pa Pakistan nunger sepaitemi apu.
Anüng nung raraba mapang nung Abhinandan-i aniba Indian Air Force indang MiG 21 Bison jagi Pakistan nunger Air Force fighter tayimtsü ka kahzüka liasü.
Pakistan nunger tayimtsüji anünglen nungi Pakistan tsütsüleni tsükba ali nung alir sepaitemi angu. Iba rara nung MiG 21 tayimtsüjia tsükok. Varthaman ya February 27 nü Pakistan sepaitemi apu, ajisüaka Pakistan Ato kilonser, Imran Khan-i, yimjung temaitsü pai India nunger pilot chioktsü, ta sangdongba sülen anogo ka lir March 1 nü chioka liasü.
Central sorkari ashiba agi, Param Vir Chakra ya, taküm bendanga agüja mesüra ali nung, tzüyim nung mesüra anüng nung tsükchirtem matsüngdang tasütait tanela sayur sepaitem nem agutsür.