Meghalaya Congress MLA temi Governor mokdang

Shillong, March 8 (Agencies): Hokolbarnü Meghalaya nung State Legislative Assembly indang Budget Session mezüng anogo Congress MLA temi Governor-i o jembiba mangai kimai alu.
Governor Tathagata Roy-i Kashmiri nunger mokdangang ta Twitter nung sangoktsüba anema Meghalaya Congress Legislature Party (CLP)-i pai o jembiba mokdang.
Roy-i iba tebilemba lemsatepba ya maaksü ka lir aser Governor indang menden mezüngmeshiba lir, ta Congress MLA temi ashi.
Jammu & Kashmir kübok Pulwama nung kiralongrartemi sepaitem amakba sülen anogo 5 lir külen Meghalaya Governor-i ‘Kashmiri ta asüba ajak mokdangang’ ta yimjak nung metetdaktsü.
Iba ashishitep aketba onük sangoktsüba ya taoba Jammu & Kashmir chief minister Omar Abdullah dena lennir aikati magizük. Congress lennir tejen aser taoba finance Minister P Chidambaram-ibo Prime Minister Narendra Modi dang Meghalaya Governor merenshitsü atema jazük.
Maneni, Communist Party of India-Marxist (CPI-M)-ibo President Ram Nath Kovind dang Meghalaya Governor mapa nungi anentsütsü atema ayongzük.
Ajisüaka, tanü Meghalaya Chief Minister Conrad K Sangma-ibo iba inyakyim atema Congress aitsü.
Budget Session mapang Governor-i o jembibaji yimya dang aser iba mapang Congress MLA tem madenbaji Governor menden mezüngmeshiba lir, ta Conrad-i ashi.
“Iba ya shitak masü. Asenoki Governor den magatettep alitsü akok saka pa nija sasep nung jembibaji Governor menden den mesentakteptsüla. Küm shia Governor-i o jembibaji inyakyim nung lateta aliba lir aser iba nung madenbaji Governor menden mezüngmeshiba lir” ta paisa ashi.
“Nenoki kija tangatetba ka magizüker asütsü akok saka iba ya Tathagata Roy masü saka Meghalaya indang Governor dak sendakba lir” ta Conrad-isa shisem.
Ashishitep aketba onükji Meghalaya Governor indang official handle nungi masü saka Tathagata Roy indang personal account nungi sangdongba liasü, ta paisa metetdaktsü.