DGC nung teburtemi tetsür tesayurtem tushi

Dimapur, March 8 (TYO): International Women’s Day tenüng nung Dimapur Government College nung tebur tesayurtemi sentong ka ayongzüka agi.
Iba sentong ya UN International Women’s Day omen “Think Equal, Build Smart, Innovate for Change” nung ajemdaker agi.
Iba sentong nung documentary film ana sayu aser kaji “Our Work, Our Identity” ta ser Nagatsürtemi yimdong nung shishilembaba indang liasü.
Tanabuba documentary ji “Pray the Devil Back to Hell” liasü aser iba film ajanga sempet aika nguteta lir. Iba film ya Liberia nung tetsürtem longjemer civil war anendaktsüba aser parnok linük nung yimjung bener aruba indang liasü.
Iba sentong nung mendenji Liphe Naro liasü aser Biswajit Sarkar-i anküp tepela o jembi. Tetsürtem tenüng nung DGC Principal Kavili Jakhalu-i tepela o jembi.