Mizoram Governor-i mapa toktsü; Shashi Tharoor den tokteptsü akok

New Delhi, March 8 (Agencies): Mizoram Governor Kummanam Rajasekharan-i Lok Sabha elections nung tokteptsü atema Governor menden nungi anen.
Pai Kerala kübok Thiruvananthapuram nungi Congress MP Shashi Tharoor den tokteptsü imlar.
“Party-i ni Kerala nung lidaktsünüba agi ni menden toktsü. Nia Kerala nungang linür aser iba jagi Governor mapa nungi anen” ta Rajasekharan-i tanü osangbener dang ashi.
2015 küm Rajasekharan ya BJP Kerala unit nung president inyaktsü shim aser iba sülen yaküm May ita Mizoram nung Governor inyaktsü shim.
President Ram Nath Kovind-i pai mapa yutsüba shidi agizükogo, ta Rashtrapti Bhavan osang ka ajanga ashi.
“Rajasekharan ya Kerala nungi Lok Sabha elections nung tokteptsü. Pa ya Thiruvananthapuram nung Shashi Tharoor anema toktepdaktsütsü akok” ta BJP lennir kati ashi.
“Iba ya BJP aser Sangh Parivar teloktem atema osang tajung lir” ta Kerala BJP president PS Sreedharan Pillai-ia tanü ashi.
Assam Governor Jagdish Mukhi nem Mizoram Governor repsema inyaktsü atema mapa lemzüktsüogo, ta Rashtrapti Bhavan-i metetdaktsü.
Shashi Tharoor ya Thiruvananthapuram constituency nungi kümsük anabuba Lok Sabha MP inyaker. United Nations nung mapang talang ka inyakba sülen Tharoor India-i meyipa aru aser 2009 küm mezüng atema Parliament nung züngsem aküm.
Rajasekharan ya mezüngbo journalist ka liasü aser 1976 küm Food Corporation of India nung inyaktsü tenzük. Ajisüaka, 1987 nung pai sorkar mapa toktsü aser full-time social worker ka aküm.