Nagaland nung Congress asentenshir

Dimapur, March 8 (TYO): Hokolbarnü DCC office, Dimapur nung Nagaland Pradesh Congress Committee (NPCC)-i taoba mapang Congress lennirtem pelaa agizükba sentong ka ayonga agi.
Sentong nung o jembidang Naga nunger lennir tejen aser taoba Odisha Governor, Dr S.C. Jamir-i “iba sentong ya mapang shitak ka nung agir aser tanü Congress akangshiogo” ta ashi.
Paisa taoba mapang party toktsür aoertemi ayongzükba den party sasep nung obang meputep onüktem malitsüla ta ashi.
Indian National Congress (INC) ya alizüng ayuba aser tangatetba tajung nung tentetba party ka lir. INC ya kodanga tera nungi atsüteta meindoktettsü anungji party züngsemtemi Congress indang sentong aser asalentongtem inyaktsüla aser osang prokshitsüla, ta Dr. S.C Jamir-i ashi.
“Nagaland nung regional party temi sorkar ketdangsübaren raksatsüogo aser sen yong politics inyaker. Naga nunger rongsen tali penpua akümba ajanga BJP nem menden 12 tashi nung takok ngudaktsü. Ajisüaka, Assam dak alaka tanünga Northeast state temibo BJP azüokteta lir,” ta paisa Naga nunger asoshi tayongzükbatem lemsatepdang ashi.
Naga loktiliba koda masü tia ka nung lir. NPF party tashi lulaogo aser külen NDPP ya nübortem ashioktsütsü atema khen atema renemba mapa ka dang lir. Naga nunger yimsüsür nem manishidaktsütsüla aser Congress züngsemtemi nüburtem dang ochi ashitsüla. Asenoki parnok tenzüktsü, yaritsü aser len anitsü ta osang tejangja sangoktsütsüla, ta Dr. S.C Jamir-i ashi.
Taoba Congress lennirtem tanaben party nung pela agizükdang NPCC president K Therie-i “Congress ya ajak asoshi lir aser taoba lennirtem adenba ajanga Congress-i BJP aser parnok den yaritepba regional party tem den tokteptsü imlar” ta ashi.
Taoba küm 16 tashi Congress-i opposition ka ama timtema aruogo. Maneni taruba anogotem lennir aika asenok den adentsü, ta paisa shisem.
“Küm asem tejakdang Congress lennir kari party telemtetba magizüki party toktsür ao. Tanü parnok tanaben party nung züngsem akümba ajanga tesüiba mapang taku chitepba ajak amadoker. Asenoki tarutsü dak ranglokdi aser temaba jenjang atongtsü atema teimla yudi. Asenok longjemra Nagaland nung nübortem timtem aser khuret balala nungi anitettsü” ta NPCC General secretary, Capt. GK Zhimomi-ia ayongzük.
Iba sentong nung taoba NPCC President SI Jamir, Ex Speaker NLA Z Lohe, aser Ex Dy Speaker NLA Joshua Sumi nungertemia o jembi aser parnok tanaben Congress nung züngsemba atema pelar ta ashi.
Asenoki secularism kümzüka ayutsü atema raratsüla anungji tesüiba mapang mangatettep alibatem amakdokdi aser Congress tasen kümshir nübortem kümzükdi, ta parnoki ayongzük.
Tanü Congress nung tanaben adenertemji SI Jamir, Nillo Rengma, Ex Minister Z Lohe, Ex Speaker Joshua Sumi, Ex Dy Speaker Dako Phom, Ex MLA Supongmeren, Ex MLA Vaprumu Demo, Ex GS NPCC nunger den lennir 14 liasü.