DNSU Mendenpurtem tasen shima tenangzükba agidaktsü

DNSU mendenpur tasentem (tejaklen mena alirtem) den HPC NSF pur aser tejaoker tongtipang lennirtem den agiba noksa angur. (Dimapur, March 12)

Dimapur, March 12 (TYO) : Taoba küm anaasemka Dimapur Naga Students’ Union (DNSU) mali küma anenadoker liasüba tia nungi shia arudaktsür, tanü Mongolbar nü High Power Committee (HPC), Naga Students’ Federation (NSF) ajanga mendenpurtem tasen shima tenangzükba agidaktsüogo.
HPC NSF nung ya tayonger Wb. K.Temjen Jamir den Wb.V.Pushika Awomi, Wb. Gentleson Vashum, Wb.Sakho Angami, Wb.Machio Lotha aser Wb.Akhrieo Lazio nungertem taoba 2018 küm April nung NSF-i shimtsü.
Iba committee jagi akhi DNSU kübok aliba Naga nunger kaketshir telongjemtem den senden aiben mena DNSU tanaben kümshitsü asoshi mendenpurtem shimba yimya ya election masü saka nüngtet luden ka ajanga teshimdang shimdi ta lemtet aser iba telemtetba nung ajemdaker temzünga melenshi ta HPC nung tezülur Wb.V.Phushika Aomii metetdaktsü.
Tang shimba DNSU mendenpurtem ya telok tsüngdang Tsüngrem tenüng nung pei mapa nung nendaka aser ochishia inyaktsü aser Naga nunger kaketshirtem ajungtsü atema bendanga agüja tenzüktsü asoshi tenangzükba ka HPC nung tayonger Wb.K Temjen Jamir-i agidaktsü.
Iba sentong nung Deputy Commissioner, Dimapur Wb.Kevekha Kevin Zehol-i jembidang, HPC ajanga DNSU tanaben tashi itta shia arutsüsa inyaktetba asoshi tenüngsang agütsü aser kaketshir lenirtemi Naga nunger lokti ajungtsü asoshi bendanga agüja inyaktsü imlar ta metetdaktsü.
Dimapur DC-isa aruya aliba Lok sabha election ya merüka agitettsü asoshi kaketshirtemi shilem tilakabosa agitsüla ta ayongzük.
Iba sentong nungsa Naga Council Dimapur tir Wb.Bangerloba Longkumeria kaketshirtem dang tangar dak metaloka melii peisasa inyaktetba agi Naga nunger yari tenzüktsü asoshi ajungshi. Paisa DNSU mendenpur tasentem nem tenüngsang agütsü.
Iba sentong nung NSF tir Wb. K. Christopher Ltuia tepela o jembia liasü aser Eastern Bible College nungi kaketshirtemi ken tajung ka aten.
Tanü DNSU lenitsü asoshi tasen shimertem Tsüngrem nem bendanga agüja Town Baptist Church Dimapur nung sannüker Rev.Vilodi Sakhriei sarasademtsü aser mendenpurtem tenüng nung tasen shimsang tir Wb.Sedevilie Angami-i parnok nem agütsüba maongka pelaa agizüka jembi.
Iba sentong tenzüka Dimapur Sumi Baptsit Arogo nung sannüker, Wt. Juliet Shikhui sarasadem aser HPC züngsem Wb.Sakho Angamii telok pelaa agizüka jembi. Iba sentong nung menden HPC züngsem K.Mhachio Lotha liasü aserWb.Akherio-i shilem agir aser yaritepertem ajak dang pelaba metetdaktsü.
Tang nungi 2021 tashi küm ana DNSU nung mendenpurtem asütsü asoshi shimertemji,
President : Sedevilie Angami, Vice President: Sentimeren Pongener, General Secretary: Mhajan Tsopoe, Asst, General secy: Mteisuiding, Secretary Finance: Sedelo T. Vadeo, Secy, Social and Cultural: Akuto Yeptho, Secy. women affairs: Kevibeinuo Keditsu, Secy. Games & sports : Khamjailung Kamson, Secy. Edn. & Statistic : Tenyebinlo Himb, Secy. Debate & symposium : Chuthuzhuni Chache, Speaker – Nupato K Chishi nungertem liasü.
Nübo peria mengutetba agi Deputy Speaker aser Secretary, Publicity & Information meshimi toktsü.