Peren nung PMMVY Awareness cum training sentong agi

Dimapur, Metsüremi/March 13 (Agencies): Department of Social and Welfare, Peren-i March 13, 2019 nü Integrated Child Development Scheme (ICDS) kübok Pradhan Mantri Matru Vandana Yojana (PMMVY) Awareness cum training sentong ka Peren Town, GB hall nung ayongzüka agiogo.
Peren, CDPO Asangla-i ojembiba mapang sentong nung dena alirtem dang Poshan Abhiyan aser PMMVY na tesendaktep indang rasaa ashiba den scheme ana tebendang metetdaktsü. Laisa Poshan Abhiyan ajanga tanur nutrition dak sendakba maparentem achaayanger aser PMMVY ya mashisa aliba tetsür aser mama yongdakja aliba tetsütem nem teyari agütsütsü atema lir, ta ashi.
Sentong nungsa Peren District, PMMVY Cell, District Coordinator Keyizieteing Ndang-i PMMVY scheme ajanga tajangzük agütsüba tem koda agitsü iba indang rasaa ashiba den form koda fill up asütsü, shirnok temsüa lir, kuli kaket kechisa nungdaker aser tanga tenüngdakbatem Anganwadi workers tem dang rasaa ashi. Iba sentong nung Peren Block kübok yimtsüng balala nungi Anganwadi workers parnok 64 dena liasü. Iba training sentong ya CDPO Peren Block, Supervisor, Pauning lenisüba kübok aka.
Kasa anogo anepdang Peren jila nung Poshan Abhiyan programme kübok Poshan Pakwada sentong nung tanur parnok 42-i nutrition awareness atema placards tem sayaa liasü, ta ketdangser sangdong ka ajanga metetdaktsü.