Yemen nung Gujarat nunger rong nung senzür 70 mejenbuteti lir

New Delhi/Ahmedabad, Sept. 13 : Yemen lima nung yimten tensa kanga mejungi aliba ajanga bendangertem pei pei limai meyipa aoba mapang ka nung India nunger rong nung senzür parnok 70 shi mejenbuteti .lir aser itemji kümzüka anir arutsü asoshi India sorkari merangdagi. Item rong nung senzür 70 ji Gujarat nunger lir.
” Yemen (Camp Office -Djibouti) nung aliba India mission-i tensa tiaji meteta lira ser parnoki India nunger timtem tia nung alirtemji anitettsü mapa tenzükogo,” ta External Affairs Ministry Spokesperson Vikas Swarup-i Delhi nung metetdaktsü.
Tzüim nung senzür India nunger 70 ji tzüimküm nung Kutch nung aliba Mandavi aser Jamnagar nung aliba Jodiya aser Salaya yimtsüngtem nungi lir. Parnok ya rong pongo nung oset bener oa tongtsütsü asoshi aoba purtem liasü aser tang parnok ya Yemen nung Khokha port ta ajaba tsem nung anogo 15 tashi kechalenia mouteti anena lir. Parnoki sorkar dang parnok kümzüktsü osang yokofo.
Iba timtem ya Yemen nung Saudi-i aniba teloki tayimtsü nungi amakba lendong nung India nunger trok sütsüba sülen ataloker. Iba lendong nung asür par trokjia Gujarat nunge liasü.
” Tzüim nung senzür Gujarat nunger parnok 70 rong pongo nung kecha lenia mouteti anogo 15 shi anena lir. Parnok kümzüka anitettsü atema sorkar teyari nüngdaker,” ta Vahanvatta Association of Kutch & Mandavi Tir Haji Junejai metetdaktsü.
” Ni yashi Ministry of External Affairs dangi tzüim nung alirtemji kümzüktsü mesüra parnokji tesem tajung balaka nung kümzüka ayutsü atema osang yokogo,” ta paisa ashi.
” Rong nung alirtemji temeimtsü tia nung lir, kechiyong parnok anemaji bomb yoker. Yasüng parnok anema shirnokisa yokar memetet rocket launchers yokba lendong nungi parnok kümzüka lir,” ta paisa ashi.
Tzüim nung mejenbuteti alirtem rongnung Mandavi nunger Sikandar ta ser nisung kati kinungertem dangi yokba osang ka nung yasüng nisung kari parnok anema bomb lendong agütsü ta metetdaktsü.
” Ni India nunger. Kü tenüng Sikandar. Onok Khokha port nung lir. Parnoki onok alidak rocket launcher asem yok saka onoksasa kümzük. Onok taodak maka, onok taküm kümzüktsü asoshi oli aruli ta jajar,” ta Sikandar message yokba ajanga metetdaktsü.
” Onok India nunger 70 rong pongo nung mejenbuteti anena lir. Parnoki onok anema bomb yoker. Imlibilema onok yariang. Onok kanga timtem tia nung lir. Parnoki onok tepsettsü. Imlibilema onok kümzükang,” ta paisa metetdaktsü.
Yemen nung ya sorkar anema Shiite nung alir telongpurtemi inyaker. United Nations ajanga inyakdangba nung March ita nungi tenzüka nübortem rongnung meputep adoka raraba nung nisung 4,500 shi sür asütsü ta asadangtetter.
External Affairs Ministry ajanga ashiba agi, India nunger parnok trok Saudi nungertemi anir amakba lendong nung September 8 nü süogo.
‘Mustafa’ aser ‘Asmar’ ta ajaba rong ana nung India nunger nisung 21 mener ooya alidang anüng nungi injang yoka amak , aser iba mapang India nunger nisung tenet samaogo ta jembiba rongnung parnok trokji dena liasü.
Ministry osang ajangsa metetnüba kaji, India nunger tanüngba 15 rongnung 14 Hodeidah ta ajaba tesem nung kümzüka lir aser ka samar mangur.