Ni NDPP ticket manguba atema mesasar: O. Tinu Lkr

Mokokchung, March (TYO): NDPP ticket manguba atema sasaa mebilemer, kechiyong ticket-ji tongtibangba masü saka nübur tenzüktsübajiang tongtibangba lir, ta O. Tinu Lkr shiba 26 Aonglenden Assembly Constituency bye election intending candidate ka lir, pa Kohima nungi Mokokchung-i shilangba mapang pai osangbenertem den jembidang metetdaktsü.
“Odila Imtikümzük Lkr, Nationalist Democratic Progressive Party (NDPP) ticket nungi adoker yimsü tesüdak nung pa iba lima nungi pilaba ajanga pa nem akhüm tetushi agüja NDPP ticket meshidangogo, saka kü nem NDPP ticket magütsü”, ta pai ashi.
“Ajisüaka ni NDPP ticket manguba atema sasaa mebilemer, kechiyong ni asoshi ticket-ji tongtibangba masü saka nübur tenzüktsübajiang tongtibangba lir,” ta paisa jangjashitsü.
“Ni ticket mangubaji Tsüngremi ni asoshi sentong balaka nung nübur tenzüktsü atema yanglutsütsü ta amanger,” ta paisa ashi.
Aonglenden A/C ya tongtibang constituency ka lir, iba constituency sangertem tenzükba den nübur tejakleni anir aotsü atema ni election nung noktaktsü mulungtetogo, ta pai osangbenertem dang ashi.
Iba osangbeneri O. Tinu Lkr dang, “Na Koba ticket nungi tokteptsü?” ta metetnüa asüngdangdang, “tangbo ibaji shia matar saka yakta sangdongtsü,” ta ashi.
“Voter-tem dang teshinüba kar ali asü?” ta iba osangbeneri metetnüa asüngdangdang, “pei senti vote senyong meyoki ochishia pei mulungba candidate nem agütsüdaktsünür,” ta pai mepishia ashi. “Odila Imtikümzük dang koda meima aru, yamaji kü danga meimdaktsünür,” ta paisa Aonglenden sanger dang mepishia ashi.
Arishi küm 47 tain O.Tinu Lkr ya Ungma nunger tsürabur C. Onen Lkr’er jabaso lir aser pa ya taoba Adviser/Parliamentary Secretary/Deputy Speaker, asür Imtikümzük teno lir.
Tanü pa Kohima yimtiba nungi Mokokchung-i shilangba mapang Ungma süngküm nung pa pukümer aika adenshia pa nem akhüm tetushi agüja agizük. Pa agizükba mapang 26 Aonglenden Assembly Constituency kübok yimtsüng aser town unit balala nungi pa meimertem den ano tembartem aser Ungma putu yimsüsür kar densema liasü.