Terenlok mapa tema inyakdangbo ola madoker: Supu Jamir

Dimapur, Metsüremi/March 14 (TYO): Nagaland Chief Minister, Neiphiu Rio aser PWD Minister, Tongpang Ozukum lenisüba kübok PDA sorkari Dimapur aser Kohima district tem nem alakteta maongka tajung agüja agüja arudar, kechiyong district ana ya Nagaland tanüdangtsü lir; temetettsü kaji terenlok bener maruba mapang nungbo asenoki ola adoker saka terenlok bener arua mapa tembanga inyakba mapang nungbo asenok ola madoker; asenoki maparen aika atema ashishir, aser ibaji tim masü, ta NDPP candidate, Dimapur-II, A/C Supo Jamir-i sangdong ka ajanga metetdaktsü.
“Merangji tatsük ali dang tsüngang” ta ashir, yamaji mapa inyakyonga aoba mapang contractor aser mapa dak sendaka aliba department den teka amteper inyaktsüji kanga tongtibang, aji asünungdang maparen ajak tajungtiba nung inyaktsü aser ibaji ajanga nüburtem ajangzükba den mangatettep kecha madoktsü,” ta pai ashi.
Anungji council ajak dang pei litsü nung mapa balala inyakba inyakyim mita atatsü aser contractor tem nem teyari agütsüba den nüburtem ajangzüktsü mechi nung pei ajangzüktsü atema mebilemtsü aser timtem magütsütsü paisa mepishi.
Maneni paisa contractor tem dang tajangzük nung dang merangloki ajak ajungtsü asoshi inyaktsüla, kechiyong lenmang yangluba ya ajak asoshi lir, ta ashi.
Paisa contractor tem aser department dang tzünglu aru metenzük tsüngda maparen ajak tembanga inyaktsü asoshi asüngdangogo, kechiyong mapa anendaka ayuba ajanga nüngdak makaba timtem aika adoker aser sorkar nükjidong raksatsüba dang masü ibaji ajanga nüburtem akoksatsü, ta ashi.