Lokti tentettemi shishilembartem dang sangdonger

Dimapur, Metsüremi/March 14 (TYO): Naga Council Dimapur (NCD), GB Union Dimapur (GBUD), Dimapur Urban Colony Chairman Federation (DUCCF), Naga Women Hoho Dimapur (NWHD), Dimapur Chamber of Commerce & Industry (DCCI) aser East Dimapur Business Association (EDBA) tentettemi NSCN (IM) dang Amongnü nüngdakba aonsotsü/osettsüsettem ayokba nokdanga aliba agienjang ta mepishia liasü, ajisüaka NSCN (IM) nungi telangzüba mali, anungji parnoki temepishiba agizükogo ta züngshir, ta parnoki sangdong ka ajanga metetdaktsü.
Anungji temalen aguja aliba tentettemi teraksatsü aonsotsütem, groceries, nanglong aser mozü shishirtem, hotels, restaurants aser travel agencies dang taruba Amongnü (March 17) nungi tenzüka Dimapur municipal area aser East Dimapur jurisdiction nung shishilembatsü tuyur, ta parnokisa metetdaktsü.
Agüja aliba tentettemi peipei tesem nung iba tetuyuba mangartem nem temerenshi tulu agutsütsü, ta parnokisa metetdaktsü.
Temalen aguja aliba melungtet teloktemisa NSCN (IM) lenirtem dang melungtet teloktemi lemtetba dak sendakba nung tejangja tetuyuba aser telatetbatem melungtet teloktem nem agüjang, ta mepishia metetdaktsü.
Ano külen melungtet teloktemi shishilembartem dang, kanga kümdanga mita alitsüla, kechiyong Amongnü nokdangba nung ramamata aliba nungi nisung tamajungertemi maongka agitsüa akok aser dokan lapokba atema fees/tax meshitsüa akok, ajisüaka item osangji idangyongjisa ketdangsertem nem metetdakjang, ta metetdaktsü.
Parnokisa district administration aser police dang, amokmeren tatalokbatem nokdangtsü atema dokan lapokba tesemtem nung security sepaitem uniform aser civil süoshi nung peria yokang, ta mepishia metetdaktsü.