Mkg D.C & ARO-i ayonga yimtenren party tem, NGO-tem den senden ka amen

Mokokchung, March 14 (TYO): Mokokchung Deputy Commissioner & Assistant Returning Officer, Rajesh Soundararajan IAS-i ayonga Mokokchung district kübok politial party ajak aser mulungtet telok (NGOs) balala den tang aruya aliba Nagaland Parliamentary Constituency aser 26 Aonglenden Assembly Constituency bye election dak sendakba nung temetettsü kar lemsateptsü asoshi ADC Planning Conference hall nung mensem ka ayonga March 14 nü menogo.
Mokokchung D.C & Assistant Returning Officer, Rajesh IAS-i iba senden nung jembidang, election sangdongba anogo March 10, 2019 nungi tenzüka election maparen metembang tashi “election model code of conduct” alitsü, anungji political party ajaki ibaji meteta inyaksangshidaktsünür, ta ashi.
Nagaland Parliamentry Constituency aser 26 Aonglenden Assembly Constituency bye election-ji külemi dang agitsü atema election commission of India ajanga sangdongogo.
Iba dak sentakba nung 26 A/C bye election nunga akhi ama polling station-ji kasa dang alitsü saka voting machine ana (2) amenoka alitsü- ka parliamentary election aser kaji bye election atema alitsü aser polling officer-a ana asütsü, ta paisa metetdaktsüogo.
Paisa ano ajaki meteta alitsü atema tongtibang onük ka ashidang, Electors Photo Identity Card (EPIC) akartemi vote indangindanga ajentettsü saka taküm temelenshi kaji EPIC makartemi akhi ama “photo voter slip” kisüng jagibo vote-ji majentettsü, ta metetdaktsü.
EPIC makartemi Photo Voter Slip denji ano item kaket mashi ka kuli atema bener arutsüla – Passport, Driving License, Service Identity Cards with photographs (central/state govt. PSU/Public Limited Companies), Passbooks with photograph issued by bank/Post office, PAN card, Smart card issued by RGI under NPR, MNREGA Job card, Health Insurance Smart card issued under Ministry of Labour, Pension document with photograph, official Identity Card issued to MPs/MLA/MLCs aser Aadhaar Card.
Paisa candidate-temi sen intoktsü atema ‘Rate Chart’ indang nenshiba den külemi ano candidate-temi tsüngdong arua office nung application magütsütetaka, “Suvidha App” amshia online ajanga nüngdaktem inyaktettsü aser iba App-ji amshitsü ajungshir, ta ashi.
Suvidha App amshiba ajanga mapang aser rongsen jenti kümzüktsü, ta paisa shisem.
Election mapang timtem kar danga adokra mesüra sorkar ketdangsürtemi tim masüba mapa inyakba kar danga putetra, pa dangi indangindanga telephone ajanga timtemji shitettsü mesüra shidi ajangaa zülutettsü akok, ta Mokokchung D.C & ARO-isa metetdaktsü.
Iba sentong nung Ao Senden tir, Chubawati Lcr-i mapang tatsüka agia jembidang, election mapang Treasury office aser SBI bank yabo election duty meyoki lapokdaktsünür, ta shia taoba mapang nüburtemi timtem ajuruba indang tatalokba kar lemsatepa liasü.
Paisa political party balala dang mepishiba olen ka ashidang, pei candidate-ji akok tashi pusemtsü tim ajisüaka election mapang nübur tip metemtettsüsa mapa tamajung kecha meinyakdaktsünür aser election tesünep nung tembangdaktsünür, ta tayongzükba ka agütsü.
Tang aruya aliba election nung tetoktepnürtemi 18th March, 2019 nungi tenzüka pei tenüng agütsütsü akok aser tenüng agütsütsü atema tatembangbuba anogoji 25th March 2019 asütsü. 26th March 2019 nü scrutiny agitsü aser candidate kari metoktepnüra 28th March, 2019 tashi nung tenüng agientsü akok. Polling anogoji 11th April, 2019 nü asütsü aser 23rd May, 2019 nü vote azüngtsü, ta Election Commission of India ajanga sangdonga lir.