Aazüka yutsüba temoatsü

Tanü asenok aika ki tajung nung chiyongtsü tajung chiajema alir aser süoshi tajung agier gari tajung nung senzüba tia jenjang ya asenoki asenoksasa aazükba rongsen aser temoatsü ta bilema alitsüa akok, saka item ajak ya asenok ajungba agi mesüra asenoki inyakba agi masü saka asen tsüraburtemi tangar asoshi tajung inyakba atema Tsüngremi moatsüba temoatsütem lir. Asenok tsüraburtem shirnok maparen tapu balala nung samanirsa inyaka aru, parnoki inyakba mapatemji reprangdangra parnoki parnok ajangzüktsü asoshi dang bilema kecha meinyak. Tsüngremi moatsü aser maongka agütsü nungji asenok tsüraburtem kaketreju balala nung pei pei yari zünger kari Yisu Khrista temeim osang tajung bener tetsüng agi memetetba aser matongba limatem tonga oagi nübortem temulung meyipdaktsü, kar tesayur aküm, kar yimten lenir kümer nübortem asoshi jenjang tajung latettsü aser kari Laishiba Ao oshi nung meyip. Iba amaji maparen balala nung nübortem sowar ama aliba jenjang nungi Aor samanirtemi Naga nunger anitet. Item tsürabur samanirtemi Tsüngrem meteta tangar asoshi tajung inyakyong par chirnurtem azükarudaktsü. Item chirnurtemji asenok lir. Aazükaru tetezü angati masü saka aazükba. Aji oda, taküm nung timtem shisabolu melii nüngdak ajak peria dang ngua, temoatsü manung jangratema aliba dang azükaru taküm, kibong aser mapang ta ajar süra, item temoatsütemji odang arubabo masü saka kari asenok asoshi aazüktsüba temoatsü senmangtem asütsü. Item temoatsü jagi asenok aika takar aser tulur kümogo. Ajisüaka, asenoki tanü asenok jenjang jungjunga reprangdangra, asen tsüraburtemi asenok asoshi aazüka yutsüba temoatsü senmangtem ajak to agimadokdagi. Joko, asenok tashi dang jangratema litetter ashi, asenoki asen  chirnurtembo jangratema lia mangur. Parnok taküm aser kibong tiaji temeimtsüka aser shisabolutsüka lir. Asenoki asen chirnur aser semchirsemnurtem jungdaktsütsü asoshi kaketreju tajungtiba nung züngdaktsür aser parnok jungdaktsütsü asoshi senotsü mekurui endoker saka majunger. Taküm aser kibong ya jangratema junga alitsü asoshi senotsü agi alizüker asünungbo asenok ajaki alizüktetla, saka item temoatsü aser maongkatemjibo sen agi alila masü saka aazüktsüba dang , iba jagi majunger. Asenok o asen tsüraburtem na tsüngda medemdangdi süra parnokibo parnok metetba agi memetetba lima tonga oagi memetettertem nüchi kümdaktsütsü tejangraba nung tetsüng agi tanitebelem arema jaja. Tanü asenokibo gari tajung nung mener asüyonga Kohima, Dimapur aser Mokokchung alema kechalenia mounür. Asen tsüraburtemibo pei aaba sen dena enokja Naga yimten nüchiso asoshi raraba nung shilem agi aser tesem balala nung arogo aser school tenzükja ao aser parnok den kasasa lia zülutsü aser azüngtsü sayu. Ajisüaka, tanü asenok mapa reprangdangra, asenok ya asen tsüraburtem memesük, asenoki nübortem asoshi tenlatsü melen nübortem  meyongang chitsür. Aji oda, asen tsüraburtembo Tsüngrem aser yimten mapa nung ochishia aser nübortem meima inyaker samanirtem liasü saka asenokbo nübortem külaoktsütsü tenzükba mapatem nungang samanirtem asütsüa akok. Itemji taaktsüka aser tesasatsüka lir. Tanü asenoki asen tsüraburtemi inyakba mapa tajungtemji senmang küma agizüker parnok dang nungi talangba oagi tajungba inyaka moutetra, asenok asoshibo temoatsü masü saka temerenshiang  alitsü. Item jagi asenok masü saka asen chirnurtem merenshitsü. Ibaji asenoki kanga junga shisadangtsüla. Iba ama onük nung mapang mapang shia shisatsü lemsatepra, atangji Aortem ya taoba mapangtem nung dang masü saka tanü dena Samanir kin asütsüsa asenoki inyaktettsü. Kechisarina tajung inyakba mapa ajak asoshi Tsüngremi tang aser tarutsü putu moatsütsü. Tang ya asenok tsüraburtemi aazüka yutsüba achir süra asenokia asen chirnur aser semchirsemnurtem achitsü asoshi aazüka yutsütsüla. Iba jagi dang parnok aazükarua alitsü.