Ao Lima Nung Mezüng Child Evangelism Tenzükba

Nagaland Arogotem nung Child Evangelism kodang nungi koma tenzük? ta asüngdangra, tenzüker Rev.Dr. Alemmeren tenüng metetshie Child Evangelism tenzükba indang mejembitet.
1959 October nung Rev.Dr. Alemmeren Impuri Tsüngrem tenzüktsü aru. Pa Impur Arogo pastor tinyaktak mapang 1960 nung Child Evangelism tenzükba, osang tatsü agi yamai:
Child Evangelism mapadong ya Ao Mungdang, (tangbo ABAM ta ajar) asoshi kenyungi mapa tasen ka liasü.
Nükjidong:-
1) Pai ashi; tekulem nung sayutsingiba ajanga taintemdang temoatsü angur. Tsüraburi sayuba aser Sundyschool nung angazükba dak alema tanürtembo Arogo nung shilem maka.
2) Tanürtemji, tarutsü, Mongdang aser Arogo lenirtem lir. Parnoknema Arogo inyakim angazükdaktsütsü nungdak.
3) Tanürtema, tekümtet-jijia kadaktsütsü nungdak (Abj. 22:6) “Tanürka pai aotsüba lemang nungji sayutetang aser pai tain akümdang iba nungi mepilatsü”.
4) Impur nung tenzüker chirnurtemji krista akaba, linük lenir, Tsüngrem tenzüker aser senso tajung kaka kümdaktsütsü merangtsüla.
Mapa tasen ka tenzüker asünung, tamasa pai kipokshiai ia tsürabur nem jung junga angatetdaktsü. Mezüng Child Devotinal sentep, Impur school ki room toluba ka nung sentep. Tanürtemji, küm 15 tekupokrogo 40 tema shi asü. Mezüng sentep nung pai sarasadem aser child sentepji tanürtem asoshi koda tongtipang anagatetdaktsü. Tanürtemi sabuba ken palala aika sayu. Arogo nung komasa inyaker mapa agi angazükdaktsü. Onok rongnung teburchanu ka Pastor shim. Iba Pastorji tesulen Rev. tashi ngua Tsüngrem tenzüker kümer retire suogo. Ano Arogo secretary shim aser Deacona parnok 5 shim. Child Pastorbai sentep ani, Deacontemi sen saru. Tanürtemi melentepa Lai azüngba aser sarasademba aser special ken atenba, shilem agi. Rev. Alemi Lai nungi otsü shile asü aser Molumi, Kodak aser tekümtet tejangja akatsü indang kanga aroka onok nem angatetdaktsü. Sentepji mesenshinuisa senshili asü.
Mapang kabo pai onok tanürtemshia dang pei pei nükjidong, kuchi kümner ta asüngdang. Nia, college nung tesayur ka kümner ta ashiba pilemteter. Nisüngshia tenung aser nükjidongji black board ka nung zülua ayu aser yamaji kümdakjang ta pai Tsüngremdang mepishia sarasademtsü. Atangjila, iba mapang alir Impur chanu ajak pei pei yari mapa inyaka tim metemi aliba angur.
Rev.Dr. Alemji, ariapilem, temeim agi sünga aliba, tagutsünu, teyarinu, ali tonga tila kümtetba, taremzük aser teyakyak tenzüker ka liasü. Impur chanu ajak pai kusasadang meim. Mapang kabo pai tanürtemdang ashi, ni nenok nem kechianga magutsür anungji nenok chiongi dang jadi, saka nenok kulemi ajatsü ku dak tashi mali, anungji anepdang aser aonung ni chiongdang nenok anana arung aser ni kechi den chiongdir ibaji lemsatepdi. Tia akarbo shi mesura ango den chiongba ajuru. Nia, metsü ngashi metepa, dal on den chiongba ajuru. Aji tesüngmangtsü jangratema chiongba mamateter. Kechiyung Impur nungerji etsüktsü aser ngashi lon den timba chiong. Dal onji remso ama pilema achi. Pai yamaji onok tanürtem den temba ayim. Yungji, onoki pai ashiba otemji suoki ia anga-a benshi. Lai o- dang masü saka awashi yimya tajung sayuba pilemteterr. Oda, ashitsü agi pai Impurchanutem nem wholestic education agutsüogo.
Iba mapang, tanürtemji tanü potu tanürtem ama nemadang, smart masü. Tasü mait, nema madang, lemsateptsü mashi, agi sünger liasü. Kechiyung anepalua sayur mali, tajungshir mali, aibelendang temenudang menutsüba potu. Mapang ka, class asem nung azünger medemer onok tetsürchanu pezü dang pai ashi, taruba Deopar temoatsü sentep ni bendanga agitsü, nenok pezüi ken ka pushir tenang ta kanga anungnung, onoki hai ta nangzük. Kodang atentsü mapang atong onokji pulpiti atudaktsü. Kenji tenzüka tendi asünung onok ajaki kensu to mepilemtet, menutepa meyipa alua aakseta amen. Kecha masü, tanür yimya dang, taruba Deopar atentesu ta pai telok dang ashi. Taruba Deoparjia pai ajungshia pulpitisa anikuter tendaktsü, saka nema madang menetepa nokdaker meyipasa alu. Tesembuba Deoparjiang junga tentet. Yamaji, tamakok angudang kodanga pai discourage mesutsü, saka takok mangu tashi merangtsü ajungshi. Meilungi onok telokji tasü ita aküm, aser mapangshia special ken atentsü programme nung inoktsü.
Impur Child Evanglisim inyakimji, Impur temekut Arogotemdanga sayua angazükdaktsütsü mechi, tanürtemji anir Arogodem semdanga jaja. Sendong ajak tanürtemidang bendanga agi. Sayutsüngi aotsü renemshiba mapang, sayutsüngitsübur tanürtemji aremi anir oa süngdongtemji nisüng kümdaktsür, item madak ayima sayutsüngidakstsü.