SC-i CM Pema Khandu anema benokba ken o magizük

Itanagar, March 15 (Agencies): Arunachal Pradesh nung tetsür kati Chief Minister Pema Khandu anema ken o benokba Supreme Court-i magizük.
2008 küm atalokba ka indang ken o nung tebang maitsü ta Chief Justice of India Ranjan Gogoi-i aniba bench-i tanü metetdaktsü.
Iba bench nung Justice Deepak Gupta aser Justice Sanjiv Khanna na dena lir.
Iba ken o benokeri la aliba tesem nung High Court nung ken o benoktsü akok ta parnokisa ashi.
Supreme Court-isa tetsürla dang bangdak ketdangertem dang la anüktsü atema police meshitsü akok ta ashi.
Police aser Chief Judicial Magistrate-i ken o magizükba sülen tetsürla yagi Supreme Court dangi aotsü telemtetba agi. La dak tashiyim agi shi nung medemba mapang la arishi küm 15 tain liasü ta tetsürlai ashir.
Iba mapang la Arunachal Pradesh nung Public Call Office ka nung inyaka liasü aser nisung kati la nem sorkar mapa agütsütsü atema yaridi ta la mesüzüka anir ao, ta tetsürlai ashi.
Sorkar mapa atema asüngdangi aodang Pema Khandu dena nisung asemji la ajurutep aser idangji Pema Khandu-i pa Army colonel ka shia tejak shiyutep, ta laisa shisem.
Tanüngba nisung anaji ka Government school nung tesayur ka aser ka Ziro nung Assistant Mineral Development Officer lir, ta lai agütsüba petition nungsa shia lir.
Parnok den senden amendang la nem mozü enokba soft drinks jemdaktsü aser iba sülen la amozüka aoba sülen par pezüi la dak tashiyim agi shi nung medem, ta laisa metetdaktsü.
Iba mapang lai nisungtemji shirnok’ar mejangja liasü saka tashi alirtem ta metet. 2012 küm Pema Khandu-i Arunachal Pradesh nung Tourism Minister inyakba mapang osangkaket nung pa indang noksa angudangang lai pa indang maitsü jangja ta tetsürlaisa ashi.
Tetsürla tenüng nung okatsürtemji Senior Advocates Kapil Sibal aser Krishnan Venugopal na aser Pema Khandu atema MS Vishnu Shankar aser Sriram Parakkat nati Supreme Court nung noktak.