Mizoram nung ZPM-Congress-i ‘people’s candidates’ shim

Aizawl, March 14 (Agencies): Mizoram nung Lok Sabha aser Assembly by-elections atema Zoram People’s Movement (ZPM) aser Congress külemi ser tokteptsü lemtetogo aser parnoki candidate tem shimba metetdaksüogo.
ZPM general secretary K Sapdanga-i candidate tem shimba osang metetdaktsü.
ZPM aser Congress-i yimtenren nung sendaktepa malir nisung ana shim aser tenaji ‘people’s candidates’ ta jaloktsüogo.
Lok Sabha candidate atema Lalnghinglova Hmar ta ser journalist ka shim.
Lalnghinglova ya Mizo lanurtem atema icon ka ama züngshir aser pai Mizo lanurtem saisapongba tsütsü lenmang lapoktsü. Pa ya tang Mizoram Football Association nung honorary secretary aser All India Football Federation nung executive member lir.
Socrrex 2014 nung Manchester aser Bahrain nung FIFA Congress sentongtem pai India tenüng nung aden.
Mizoram Premier League tenzükba aser India nung mezüngbuba Futsal league tenzükba nung Lalnghinglova-i tongti shilem agia liasü.
Pa ya Vanglaini Daily nung joint editor in-charge inyaker.
“Mizoram nung mapa teinyaktsü aika lir. Taoba mapang yimsüsür aika inyakogo saka wadang aika nung state-i tangar memenepi lir. Anungji ni kü tajungtiba agi inyaktsü” ta Lalnghinglova-i ashi.
Citizenship (Amendment) Bill atema jembidang “Iba ya party politics indang masü saka tebilemtsü tuluba lir. Mizo nunger longjema lir ta asenoki linük dang sayutsü atema iba ya maongka ka lir. Ni Citizenship (Amendment) Bill khenyongi magizüker aser ni Parliament nung züngsem akümtsü shimra, ni iba Bill noktangtsü atema akokba tashi inyaktsü” ta pai ashi.
Maneni, Aizawl West-I constituency atema ZPM aser Congress-i shimba candidate ji Lalbuanga Sailo lir. Pa ya sorkar mapa inyaker ka lir aser Assistant director of Census inyaka lia 2017 küm mapa nungi anisüngzük.
Sailo ya taoba mapang political party kecha dena tesentaktep maliasü aser pai ashiba agi Assembly nung par constituency atema inyaktsüba maongkaji mesüidaktsünür.
“Citizenship (Amendment) Bil-i linük nung mepetmesü adokdaktsür aser asenoki iba anema noktaktsüla” ta Sailo-i metetdaktsü.
“Democracy ka nung opposition party ka alitsüla. Tang sorkar ketdangsüba MLA 26 lir aser ibaji nübo nüngdakba nungi talila lir. Saka opposition ji sorkar atema teyariteper ka lir aser iba jagi asenoki opposition MLA aika nüngdaker” ta Sailo-isa ashi.