Congress-i Manifesto nung Healthcare Act inoktsü: Rahul Gandhi

New Delhi, March 15 (Agencies): Tanü Congress Party Tir, Rahul Gandhi-i, taruba Lok Sabha election atema party manifesto nung Congress-i Right to Healthcare Act inoksemtsüa akok, koba ajanga senso ajak nem minimum healthcare scheme agutsütsü, ta metetdaktsü.
Rahuli-isa Ato kilonser Narendra Modi-i aniba sorkar indang Ayushman Bharat flagship health scheme aija, “Iba scheme programme ya linük nung shishilembar 15-20 tajangzük ngudaktsütsü atema dang lir,” ta ashi.
Tang New Delhi nung melungtet telok kati ayongzükba anogo ananü Health for All senden nung medical nisungtem den jembidang Rahul-i, “Onok manifesto nung onoki onük asem inoktsü shisadangdar: Item rongnung Right to Healthcare Act, koba ajanga India nunger ajak nem minimum healthcare agutsütsü; GDP nungi healthcare nung indokba shilem 3 agi timba kümtsütsü aser doctor den healthcare professionals timba akümtsü onüktem lir,” ta metetdaktsü.
Paisa, taküm Lok Sabha election nung par party-i takok ngura parnoki healthcare aser shisaliok na nung sen timba lemzüktsütsü, ta ashi.
“India nung yimtsüng nungi jilatemi meyipdar. Nisung aika yimtsüngtem nungi jilai oa alir. Iba ya temela masü saka iba nung ya timtem lir,” ta pai ashi.
Gandhi-i ashiba agi, Aso 21buba nung sorkari sensotem kümzüktsü atema tongtibang teinyaktsü asem lir. Iba dak sendakba nung pai, “Mezüngbuba nung asenoki mapa manguba tebilemtsü atema inyaktsüla, tanabuba nung shisaliok jenjang dalang kümtsütsüla aser tasembuba nung healthcare tajungba agutsütsüla. Item onük nungji atsü-anem makatsüla. Itemji meinyakra asenoki takok mangutsü,” ta ashi.
Gandhi-i, “Asenok sensak tia-i aibaji healthcare ajanga lir, aser ibaji ajaki meteta lir. Tamendakdakji healthcare lir. Tamendakdak tashi aittsü atema ibaji inyaktsüla. 2019 küm Congress sorkari healthcare aser shisaliok nung sen timba lemzüktsütsü,” ta ashi.
“Nisung ishika nem sen aika agutsübaji onoki memelatsü. Ayushman Bharat scheme ya yamaji lir. Iba ya atakzüka aliba scheme ka dang lir, kong healthcare onük kar dang lir. Iba ya India nung shishilembar takar 15-20 shi tajangzük ngudaktsütsü atema dang lir,” ta paisa ashi.
Gandhi-i, party-i shisaliok nung GDP shilem 5 aliba nungi 6 kümtsütsü bilemdar, ta ashi.