5MVA transformer tasenba Mkg tongogo

Mokokchung, September 13, 2015: Mokokchung Town Lanur Telongjem nung lenirtem den Mokokchung Electrical Division nung Executive Engineer  Moa Aier (tachijilen nungi tasembuba) nunger Dimapur nungi bener atuba 5MVA power transformer tasenba anasa tangokba noksa ka yangi angur.

Dimapur, September 13 (TYO): Mokokchung indang 5MVA raksaba ajanga ibaji melena September 13 nü 10:20 meta transformer tasen ka Mokokchung tongogo.
Mokokchung Executive Engineer (Electrical), Er Moa Aier den külem inyaker aser Mokokchung Town Lanur Telongjem (MTLT) nung lenirtem lia iba transformer bener tua atong. Iba osang angashia hopta ishika electric mali timtema aliba jila nüburtem temulung alii aluogo.
Er Moa Aier-i, iba transformer mapa inyakdaktsütsü asoshi mezüngbuba ghonda 24 bo charge asütsüla, ta ashi.
Anungji transform amenoka charge asütsü atema mapang nüngdakba ajanga ano anogo ana nübo arema atatsüsa akümtsü.
Department nung inyakertemi transformer tejenbaji amensaa Dimpapur-i bener yokba sülen ang tasenbaji amenoktettsü. Anungji iba mapaji jungjunga matem tashi nüburtemi ano khen arema ata alitsü asoshi, MTLT-i jila nung aliba nüburtem dang mepishia metetdaktsüogo.
MTLT-isa, tangbo transformer tasenba Mokokchung tongerji nüburtemi electric tekaratiba nung angutsü, ta ashi.
Mokokchung nung aliba 5MVA power transformer ya August 26 nü raksaa liasü koba ajanga jila nung alirtem aser anasa aliba yimtsüngtem nung electri melii kanga timtemtepa arur.