Kara ainba putu nung zübazülema malitsüla

Dimapur, March 15 (TYO): Kanga dang kara ainba putu ka nung asenok zübazülema malitsüla saka külemi shilem agia aintsüla, ta Alemtemshi Jamir IAS (Rtd)-i ketdangsertem ayongzük.
Directorate of Information & Public Relations nung officers’ conference nung jembidang pai iba tayongzükba agütsü.
Alemtemshi-i ‘Government media in the age of Acceleration’ onük jembidang “Kara ainba putu ya memelenshitsü anungji asenoki iba putu den koma anidaktsü ta asüba bilemtsüla” ta ashi.
Social media dak tashi tulu lir aser osangtsüsang kanga jung prokshir. Ajisüaka, iba ajanga telemtetba ka magiteter anungji asenoki kodaser social media azüoktettsü ta asüba lenmangtem bushitsüla. Iba ya azüoktsü atema department-ia shilem agitsüla. Asenok ola madoki malitsüla saka kümküma alitsüla aser asen loktiliba nung kongshiba onüktem indang osang prokshitsüla, ta paisa ayongzük.
Naga nunger melenshitsüla aser tejakleni aotsüla kechiyong asenok kanga dang kara ainba putu nung alir. Naga nungeri tax agütsütsüla aser lenmangtem o terenlok maparen atema kibur akümtsüla. Tax agütsüba ajanga sorkar mesüra nisungtemi nisung ka ket nung pa dak malangba rongsen ali asü mali’ar metettsü, ta Alemtemshi-isa shisem.
Media ya ajak dang nungi mezüng tejakleni aotsüla aser sorkar media-i shilem tongtipang agitsüla. Tanü putu nung media-i sangdongba nung ochi alitsüla aser ratamataba agientsüla, ta paisa metetdaktsü.
Iba sentong nung Commissioner & Secretary, IPR, V. Maria Yanthan aser IPR, APRO Atuzo natia o jembi.