Shillong nung NSUS-i sobaliba sentong ayongzük

NSUS teloki ayongba sentong nung shilem agir Khasi, Mizo aser  Arunachal nungertem den tongti tesemdanger,  ARC aser NSUS lenirtem noksa nung angur. 

Shillong, Sept.13 (TYO) : Shillong nung Naga nunger sobaliba sentong ka yashi Honibar nü Naga Students’ Union Shillong (NSUS)-i ayongzüka agiogo.
Iba sentong nung Nagaland Parliamentary Secretary, Art & Culture Wb. E.Eshak Konyak tongti tesemdanger liasü. Iba sentong ya Naga Community Hall nung liasü aser kaketshirtem den tantsü tambu tajungtem aser tejaoker tongtibang nisungtem agi ki sünga adenshir kanga longsua takok manung agiogo.
Naga nungertem den ano tongtibang tejaokertem Arunachal Students’ Union, Khasi Students’ Union aser Mizo Students’ Union nungi lenirtem dena liasü.
Iba sentong ayongzüker nem tenüngsang agüja jembidang, pai kaketshirtem den pai bilemba tongtibang onük kar lemsatepnüba agi iba sentong nung adentsü agizük ta tongti tesemdanger, Wb.E.Eshak Konyaki metetdaktsü.
Paisa Shillong nung azünger Naga nunger kaketshirtem dang takok angutsü asoshi meranga inyaktsü ajungshi aser Naga nunger longjema alitsü asoshi tayongzükba agütsü.
Tongti tesemdangerisa Naga nunger tebu tedi tajungtemi Naga yimten tebilemtsü akoktsüsa anibelem arema inyaka aruba asoshi tenüngsang agütsü aser memenui Naga nunger asoshi anogo tajung ka adoktsü imlar ta metetdaktsü.
Wb.E.Eshak Konyakisa Naga nungertemi ayongzükba sentong nung tangar kintemia shilem tajung agiba asoshi pelaba metetdaktsü aser Nagaland nung Horbill benjongmong nung aruagi adentsü jaok.
Shillong ya shisaliok angazükdak tesem tajung, takar lima, ken atenba nung nüngtugu aser temerük tesem ka asünungji, kaketshirtemi item temoatsütemji agia tajung akümtsü merangtsüla ta paisa ayongzük.
Kasa sentong nung Pakon Phom, Assistant Resident Commissioner, Shillong aser Tolu Chophy (Naga Elders’ Forum Shillong) nati tajungshi o jembia liasü.
Iba sentong nung sobaliba ken aser yartsüngsang toktepba nung tetendangertemji Wt.Atula Yaren Sharma, Ketoulhoukho Suohumvu aser H.Abraham nungertem liasü.