New Zealand PM-i Gun Law yanglushitsü azüngashiogo

Christchurch, Metsüremi/March 16 (Agencies): Christchurch nung mosque ana amaksang-i nisung tepsetba nung amshiba semi-automatic rifles ana densema prangbong ponguprongla ya ozüng kübok aibelen mesüi ali ta sangdongba sülen New Zealand Ato Kilonser-i linük nung gun laws tesashiba küma yanglushitsü atema azüngashiogo.
Kidanger linük Ausrtalia den medemdangra New Zealand nung firearms laws tashimait. 1996 küm tang atalokba ama Australia nunga atalokba sülen gun law tashitaitba küma yanglushi.
Jacinda Ardern-i ashiba agi, arishi küm 28 tain Australia nunger Brenton Tarrant-i “Category A” gun licence ka 2017 November ita agizük aser iba ajanga Christchurch kübok mosque ana nung tekülemertem akhatsü atema prangbongtem alia liasü.
Pai amshiba prangbongtem karbo tashi taitba kümdaktsütsü atema yanglushir liasü ta laisa ashiba den semi-automatic weapons amshitsü atema tenokdangba agütsütsü asoshi asadangtsü.
“Iba nisungba yagi gun licence aser prangbong tesashi alitetba tetezü nüburtemi temelenshi aginütsü amai bilemer aser ni iba temelenshi bener arutsü atema bendanga agüja inyaktsü,” ta lai osangbenertem den sesaksemba mapang ashi.
“Ni tang nenok dang ya shitettsü… asenok gun laws melenshitsü,” ta laisa ashi.
Ardern-isa, aija alisang aser pa den teyariteper ana shirnok puogo pranok ya extremism dak sendakba nung intelligence agencies-i meita liasü.
“Ni asen linük nung agencies tem dang tanep iba lendong ataloktsüsa social media nung inyaksangshi kecha liasü maliasü aji asadangtsü atema shiogo. Maparen tang tinyakdak lir,” ta lai ashi.
Ardern-i iba ken o süoki ia asadangtsü atema azüngashiba New Zealand Police Association tekolakba Chris Cahill-i pelashishia agizükogo aser ashiba agi, taoba mapang nung prangbong amshiba nokdangtsü atema merangdangba tamakok ngua liasü aser iba ya temelenshi atema kanga sashia anemba ajanga liasü, ta ashi.
“New Zealand nungertemi asen linük nung nisung kati pranbbong paikaya alizüka amshitetba ya aoksa aser süngmanga alitsü ta bilemer,’ ta pai ashi.
Paisa Australia nungba yagi par linük nungbo kasa prangbong ya maliteti lila ta sasa bilemba lemsatep.
Tarrant-i amshiba prangbong rongnung AR-15 ya United States nung telok balala dak akhaba nung amshiba kasa semi-automatic rifle lir. US kübok Connecticut nung 2012 küm Sandy Hook school lendong nunga kasa prangbong amshia liasü.
Sandy Hook lendong nung asür kinungertem nem tawa US nung prangbong yangluba company Remington anema ken o benoktsü atema temelaba agütsüogo. Parnoki metetsümonga military grade weapon tem nüburtem dang ayokba, koba ajanga nisung aika khasetogo, iba dak ajemdaker parnok anema ken o benoktsü atema temelaba agütsü.
Christchurch nung lendong tulu atralokba sülena local tem karibo prangbong nokdangtsüba dak sendakba nung mibelemdangi jenjang magitsü asoshi shiogo.
“Iba ajanga ajungbena temelenshitsü matoktsü imlaa lidi. Lenmang nung nisung aika tepseter ta ser asenoki gari menokdanger. Jenjang magi tsüngda ken o kanga junga bushitsüngdangtsüla,’ ta Matthew Simmonds-i ashi.
Aramoana nung 1992 küm tekolok meshidak nisung kati nisung 13 khasetba sülen New Zealand nung semi-automatic rifles aliba dak sendakba nung ozüng akangshi.
Ajisüaka semi-automatic weapon tem nokdangtsüba aser ozüng akangshitsü asoshi merangdanga aruba parliament nung bangdaka lir.
New Zealand nung Arishi küm 16 nungi tema nisung mashi kati safety course ka ajangtetba aser police temi asadangba sülen küm 10 atema firearms licence ka atema apply süteter.
New Zealand Arms Act kübok prangbong aika register asütsü nüngdak madoker aser police temi New Zealand nung ozüng ajanger mesera ozüng majangi aliba prangbong kwi lir aji mejangja,” ta police temi taoba küm shia liasü.
2014 küm police temi, nüburtem ket nung ozüng ajanger aliba firearms million 1.2 lir mesera nisung pezü nung ka ket nungbo firearms lir koba Australia nung aliba prangbong dang nungi anasü agi timba lir, ta asatet.