Anisüngzükba mong

Tang ya mapang tatsüka Dimapur nung amongnü dokan lapoktsüla asü melapoktsüla ta asüba nung NSCN-IM telok o arogo nungertem külen aser lokti tentettem Naga Council Dimapur; GoanBora Union Dimapur, Dimapur Urban Colony Chairmen Federation; Naga Women Hoho Dimapur; Dimapur of Chamber of Commerce & Industries aser East Dimapur Business Association teloktem külen ta ser atsütepba mapang ka lir. Atangji, alima ajunga nung Khristan-tem asoshi hopta nung anogo tenetnübuba ya mapa ajak nungi anisüngzüka  amongba amongnü lir. Ibai Tsüngremi anogo trok nü agia anüng aser alima aser yangji aliba kechisarina ajak yangluzüker külen tenetnübuba nung anisüngzüka amongba nungi tenzükba lir. Amongnü yabo alima nung Tsüngremi nisung meyangludangyongi Tsüngremi Pasasa meshiteta amongba anogo ka lir. Amongnü ta asüba ya Ibri nunger o Shabbat ta asüba nungi Sabbath ta amshia aruba nungi meyipzüka jatetba lir, kechiyong Shabbat tetezü mapa nungi anisüngzük agiba. Ajio oda, asenoki Laishiba nung Lipok tapu 2 nung reprangdangra, Tsüngremi anüng aser alima yanglur anogo tenetbuba nung ya anisüngzüka amongba dang masü saka meshiteta among ta shia angutsü. Tetezü, hopta nung anogo tenet saka Tsüngremi meshiteta amongba anogojibo amongnü ya dang lir, iba jagi temeshi amongnü ta ajar. Iba kasa amongnü ya Tsüngremi Mosa mapang Israel nungertem nem ozüng küma amongtsü asoshi agütsü, anungji Israel nunger asoshi amongnü mamongba ya Tsüngrem anema ozüng raksaba mapa ka liasü. Ibayongji, kodang Israel nungertemi amongnü junga mamong Tsüngremi parnok merenshi. Israel nungertem Babylone lima nung alar küma alitsüsa atalokbajia amongnü meshiteta momongba tai ajanga liasü. Iba amaji Israel nungertem asoshi anogo tenetnü shia tenetnübubaji pei mapa tasak ajak nungi anisüngzüka kanga reta-tsünga amongba mapang ka Yisu alimai aru. Aji oda, parnok sobaliba nung aliba ama, Yisua amongnüang parnok tenlaki synagogue-i orr Tsüngrem mapa inyakba asenoki osang tajung laishiba taputem nung aiben shia angur. Asenok asoshi tangazüktsü kaji,  Yisu nütsüngtemi tangar lu nung amongnü tsükjung mita achi, idangji Yihuda nunger yimsüsürtemi aitsütsü tenzükba mapang, “amongnü ya nisung asoshi yanglu saka nisung ya amongnü asoshi meyanglu,’ ta Yisui ashiba nungji lir. Tetezü, amongnü ya nisungtemi koma amongtsü tim aji bilemdanga amongtsüla ta angatetdaktsüner südi. Tanü asen tendaka Mosa Tsüngremji asen Tsüngrem asünungji amongnü mapa meinyaki anisüngzük agibaji dang masü saka meshiteta amongtsüla. Ajisüaka, asenok tanübo ozüng putu nung alir masü saka taochi putu ung alir asünungji, ozüng agi dokan lapokang aser telapok mesüra amongnü alui oang mesüra tou ta  ozüng agütsüba jagi masü saka Tsüngrem taochi angateta amongnü yabo mapa tasak meinyaki  sentep tajung lia pelatepa amongtsü junger. Atangji, Yihuda nungertemibo Sabbath anogo ya Honibar nüang amanger. Iba anogo amongtsü atema Hokolbar nü ajak         shishia ayur aser Hokolbar nikongdangbo yakta dokan ajak shibanger. Iba Sabbath anogo nung Yihuda nunger tsüraburtemi pie chirnurtem dang Tsüngremi agütsüba ozüng aser tenangzükbatem indang ashir. Ibaji angazüka asenoka amongnü ya amongtsü junger. Alima ozüng agia mapa inyakertema nisung shia hopta nung kenübosa anisüngzüktsüla ta latetja aka nungji, asen lima ama Khristan-tem teimba alidak amongnü ya shishilembadak ajak shibangtsübaji tim dang lir. Ajisüaka, ibaji NSCN-IM teloki ashiba agia masü mesüra lokti tentettemi ashiba agia masü saka Tsüngrem mapa aser taochi angatetba agi amangba pur shiai metsüngareta amongtsüla. Iba jagi dang mamangba purtema anidaktettsü. Atangji, Dimapur nung dokanbo ajak shibang saka Dimapur nung alir tamangertembo Nagaland gate anasa Assam kübok amongnü shia shi aser ango raktepa alir ta süra Dimapur nungang dokantemji lapok tajungba ! Iba ama ashishitepba mapang ya shitakba agibo, state government-i telemtetba takang agüja Nagaland anitsü tim.