Dimapur Government College Advisory Board senden amen

Dimapur, March 17 (TYO): Dimapur Government College pur tang tasen tentetshiba Advisory Board senden March 16, 2019 nü Dimapur Government College nung menogo, ta ketdangsertem osang ka ajanga metetdaktsü.
Advisor Board Chairman- Dimapur Deputy Commissioner, Kevekha Kevin Zehol leniba nung iba senden amen. Senden nung chairman-i tang tashi nung college-i inyaka aruba mapa tajungtem atema apelaba ametetdakja liasü.
Advisor Board nung Member Secretary- Principal, Kavili Jakhalu-i züngsemtem pelaa agizük aser PowerPoint presentation ajanga college indang osang metetdaktsüba den külemi college nung tayongzükba balala metetdakja liasü.
Principal-isa züngsemtem dang 2020 küm atema 2nd Cycle of NAAC Accreditation indang metetdaktsü aser parnok dang iba atemaji renema alitsü nüngdak, ta metetdaktsü.
Senden nung Board züngsemtemi onük balala nung o lemtep aser timtem balala atema tebilemba onüktem lemsatepa liasü.