Nagaland AM & Dy. CM-i Parrikar mang ayimer

Dimapur, March 17 (TYO): Nagaland Chief Minister Neiphiu Rio-i sangdong ka nung asür Manohar Parrikar asüba osang angashia aoksaba aser jashiba osang lemsatep.
“Nagaland sorkar aser nübortem den ozü kibong tenüng nung ni tasür kibongtem asükhu lemsateper. Tsüngremi nenok nem tashi aser tesünep agüjang ta sarasademtsür aser tasür tanüla teti anisüngzük ngudakjang” ta Neiphiu Rio-i metetdaktsü.
Nagaland Deputy Chief Minister aser State BLP lennir Y. Patton-i traoba Goa Chief Minister aser Minister of Defence Manohar Parrikar asüba atema temulung züreper ta metetdaktsü.
Parrikar ya lanur asüdang nungi politics nung tetsüng ajemok aser Goa renlokba nung shilem tulu agi. Par state nung koda masüba mapangtem ajurudang pai len ania khurettem koktet, ta Y Patton-isa ashi.
Pa asüba ajanga Goa aser linük atema mangdang aketba lennir ka samaogo. Pa tango mesadem tashi nübortem atema inyak. Deputy Chief Minister den State BJP MLA temi tasür kibong den mangyim lemsateper aser pa tanüng teti anisüngzük ngudakjang ta sarasademtsür, ta Media cell, Deputy Chief Minister-i sangdong ka nung ashi.