Ano maongka ka arur

Küm ana tsüngda Nagaland nung asenok ajaki tatar yimsüsür shimba nung shilem agitettsüsa maongka asembenbuba arur. Mezüngji, yaküm February ita nung Nagaland tatar senden nung amentsü atema tatar 60 shimba election agiogo aser iba sülen Lok sabha nung amentsü atema tatar ka shimba election agiogo aser tang ya ano kasa Lok sabha nung mendaktsütsü atema tatar ka shimba election April 11 nü agitsü. Atangji, Aonglenden assembly constituency nungbo tia mejungi asüama ajuruba agi ano tang Lok sabha election den külemi assembly by-election agitsüsa akümer. Item ajakji election-i aiertem asoshibo khuret saka nübortem asoshibo yimten nung pei temeten amshia yimsüsür shimba maongka talila ka arur asütsü. Lok sabha nung Nagaland asoshi menden ka lemzükja aliba nung amentsü asoshi tokteptsü atema NDPP aser Congress telok nati candidate metetdaktsüogo aser candidate anapronglaji yimten nung aiben tain rogotem lir. Atangji, Naga nunger koba telok aser shiba südir süaka election nung toktepba nükjidong metetdaktsü dang, mezüngbuba nung Naga yimten tebilemtsü koktettsüsa jembitsü nangzüktsü aser tanabuba aser tasembuba nungang nübortem asoshi terenlok mapatem inyaktsütsüba indang arutsü. Iba amaji küm aika election aru shia nangzükpet nangzüka aruogo saka Naga yimten tebilemtsü tulubaang kümdaktsüba angur aser terenlok mapa inyakbabo mangur. Tanga kasa tenangzükba ken o bener election nüboyim tenzüktsüa akok, idangji nübortemia kechi ashitsü mesüra kechi asüngdangtsü ? Tangar parliament nung pei state aser nübortem indang nokdaker arüa jembiba angudang temulung asür saka asenoki shimer yokba nisungibo aiben o jembibaji masü saka senden nung menaa mangur. Parliament-a süang mesüra assembly nunga süang, nübortemi yangji amentsü tatar shimer yokbaji nübortem tenüng nung nübortem asoshi mena kazütsüba yoker masü saka jembitsü aser jembiba ama inyaktsü yoker. Tamalen purtemi jashitsüa akok, saka tang tashi nungbo India tatar hoho nung Naga nunger MP-i Naga nunger asoshi tangar mulung koka aser asenoka temulung asütsüsa jembiba mangashi aser mangu. Ashiko, asenok India telongjem kübok süaka sobaliba nung tangar India nunger memesük asünungji, oshi tsütsü asenok tetsükdaktsü alitsüa akok, kechiyong asenok aikati Hindi junga mejembitetter aser English agia tebilemba jungabo rasaa meshitetter. Tang ama election arudang itemji kanga shisadangtsüla. Tatar-ji tatar senden nung o jembii yoker aser ajia tangar den yimten onük aika nung toktepa jembitsü. Aji oda, koba telok aser shiba südir süaka, election-i aiba nükjidongbo tajung dang asütsü saka election nung adoker külen tatar senden nung pei lima meimba shisatsü agi pei nübortem asoshi tangar mulung koka jembitsübaji kanga tongtibang asütsü. Oagi Delhi nung tatar senden alidang khenkhen Garo nungbai jembiba, Arunachal nungbai jembiba aser Assamese nungbai jembiba angudang aser angashidang kanga temulung chia bilemer aser Nagaland nungi yokba tataria yamaji onok asoshi tatar senden nung jembitet nungbo koma jungla tasa bilemer. Ashi, tangar state nungi oa jembiba amaji, Nagaland nungia linük meimba lanur temeteter kar shimteter yok nungbo yamaji jembitetla ta bilemer. Ajisüaka, lanurtemi peisasa yimten nung shilem agitsü asoshi mulungteter menokdakra, nübortemi imlabaji kodanga mataloktsü. Ashiko, election nung nübortemi sen dang meshiba agi  sempet akar lanur tajungtemi election-i aitsü mejangrar asütsüa akok. Joko, yimten telok aser election nung toktepertem nem asenok ya sen asayadang enoker asayaba oset ka amatobo mebilemdaktsütsüla aser mamshidaktsütsüla. Tangbo joko election aruba ya senyong vote ayokba mapang masü saka pei lima aser nübortem aser talisa lanurtem asoshi mangdang tajung akaba aser mangdangji tebang agi tatar senden nung süoka jembitetba yimsüsür shimtsü ano maongka ka arur ta bilema pei vote pei enoka shilem agidi.