Onük dangi arutsüla

India ato kilonser Narendra Modii nübortem mulungjang akoktsü asoshi “ni nenok chowkidar” ta tejembidak nung, ano Congress lenir Priyanka Gandhi-i takartemi dang chowkidar ayur, anungji Narendra Modiji India nunger takar kar meyong chowkidar lir ta leptsübaji tenaprongla shitak jembir amai saka India nunger taginüba onükji aji masü. Ni chowkidar aser ano nia chowkidar ta jembiba agi India nunger chi mechiyong tebok tazüng ser mapa inyaker aser yipteni aiertem majangzüktsü. ‘Ni chowkidar’ ta asüba kisüng agibo lanurtem nem mapa magütsütettsü. Iba kasaji takartemi dang Chowkidar ayur, anungji paji takartem chowkidar ta leptsüba ken o kisüng jagibo India nunger ki maka yimdong nung mejanga senzürtem aser aluyimertem jenjang tajungba mekümtsütettsü. India nüchiso anguba nungi tenzüka tang tashi nung Congress teloki teimba aser talangba India nung yimsüsüa aruogo. Ajisüaka, tang tashi India nung ki makaba aser anogo nung anaben tebok sünga mechiyongtettsüsa nübortem aliba tiaji Congress tamakok asütsü. Atangji, Congress teloki anir raraba ajanga India yimten nüchiso angu aser maparen aika nung terenlok tajung adokdaktsüogo. Ajisüaka, Congress yimli laotsüsa akümbaji, Congress government-i terenlok mapatem nung tamakok anguba kisüng agi masü saka yimsüsürtemi ochimashi inyakba ajanga BJP teloki aniba government-i parnokji atsüngdok. Aji oda, küm pongo jakdang BJP teloki Congress anema apusoba onüktem rongnung Congress nung lenirtemi bendanglen sen miima bendena ayur, anungji itemji meyipa bener arutsü aser kasa sen jagi India nung nübortem asoshi mapa tajung inyaktsütsü ta jembi. Iba sülen metsütsüi BJP teloki anir government aküm. Aji oda, tang tashi nung BJP teloki aniba government ajanga India nungertemi bendanglen miima yua aliba sen kwikashibo nguteta bener arua alitsü ta kanga metetnüa bilemer. Atangji, India yimten nüchiso ngur külen küm 70 sülena India nungertem teimbakati metsümeshidak meyanglui moapu nung amentsüsa aliba tiaji toaba mapang yimsüsüa arurtem tamakok lir. Mahatma Gandhii anir India nüchiso asoshi raraba ya British nunger kübok yimten talenba kija nungi salatsüba nüchiso tongpang ka masü saka bendangertemi inyaktetba nung nendaka malitsü aser merükmejuba nunga nüchi küma alitsü asoshi tangatetba agüja raraba tongpang ka liasü. Ibayongji, pai bendangertemi yangluba süoshi magi aser peisasa ang ina süoshi yanglutsü ajungmeso. Aji oda, pai anir Bombay (Mumbai) nungbo nübortem alidak ki telongi irr janaona ajak odokja merüktettsü. Tanü bilemdangra, India asoshi shinga masü saka India nungertem aliba ki aser tesem tonga oagi reprangdangba aser parnok nüngdakji reprangteta inyaktsüba yimsüsür nüngdaker. Yimsüsürtem ya lokti senden nung kati ka aitsütepa jembiteptsüba yimsü asür masü mesüra takdang telong nung mena yur yimsü asütsüba mapa ka masü, mesüra gari nungi malua yimsü mesütettsü. Yimsüsürtemji pei lima merüka alitsü asoshi pei teka agi jana okdoktsü mulungtetba nisungtem asütsüla. Yimsüsürtemi yimtsüng aser town shia nung tonga oagi lanurtem jenjang reprangdangtsüla. Yimsüsürtemi aluyimertem lu angutsüla, kaketshirtem azüngdak kaketreju angutsüla aser nübortem taneptsü bushidak mozü ki jenjang tonga oagi reprangdangtsüla. Yimsüsürji lenir, anungji kidang mena yur tangar tenyatsüba masü saka pei tama ser nübortem asoshi nübortem den külemi inyaktsüba nisung asütsüla. Joko election agitsü hopta asem shi dang lir, anungji ‘Chowkidar’ onük nung mapang meindoki, yimten telok shiai nübortem asoshi kechi inyaktsütsü bilemer, item onüktemji sangdongtsüla aser nübortem rongnunga item onüktem indangji shisalemsateptsüla. Nagaland nunga Naga yimten tebilemtsü ken o ya koma asütsü ? Citizenship Amendment Bill indang toa koma bilemer ? Medical aser Engineeering College atema jembiba to koda ? Lanurtem nem mapa inyak sayutsüba sentongtem to koda aotsü ? Tuli paper mill melen kechi tajungba asütsü ? ta asüba onüktem ya tang ama election mapang nübortemi kakshia jembir, sen agi masü saka tangatetba agi election nung ajaki shilem agira, Nagaland ajungtsübasa !